साउदी अरेबियामा जारी पश्चिम एशियाली फुटबल फेडेरेसन (वाफ) च्याम्पियनसिपको फाइनलमा आज नेपालले जोर्डनसँग खेल्दैछ । 

जेहादस्थित प्रिन्स अब्दुल्लाह अल फैजल स्पोर्ट्स सिटी स्टेडियममा हुने खेल नेपाली समयानुसार राती पौने १० बजेदेखि शुरू हुनेछ । 

तुलनात्मक रूपमा नेपालभन्दा जोर्डन बलियो टिम हो । जोर्डन फिफाको महिला फुटबलको वरियतामा ७४औं स्थानमा छ भने नेपाल १०५औ स्थानमा रहेको छ । 

जोर्डन वाफ च्याम्पियनसिपको डिफेन्डिङ च्याम्पियनसमेत हो । जोर्डनले अहिलेसम्म सबैभन्दा बढी पाँच पटक वाफको उपाधि जितेको छ ।

नेपाल आमन्त्रित टिमको रूपमा पहिलो पटक सहभागिता जनाइरहेको छ । तर, नेपालको प्रदर्शन भने कम छैन ।

 नेपाल समूह ‘बी’ को विजेता बन्दै प्रतियोगिताको सेमिफाइनलमा पुगेको थियो । नेपालले समूहगत चरणमा तीनवटै खेल जितेको थियो । 

आज हुने फाइनलमा महिला राष्ट्रिय फुटबल टिमकी स्ट्राइकर सावित्रा भण्डारी ‘साम्बा' भने हुने छैनन् । सावित्रा फ्रेन्च क्लबको सम्झौताका कारण फाइनल खेलमा उपलब्ध नहुने अखिल नेपाल फुटबल संघ (एन्फा)ले जनाएको छ । 

एन्फाले सावित्रालाई गुइनगाम्पले फिफा विन्डोअन्तर्गत राष्ट्रिय टिममा खेल्न अनुमति दिएकोमा बिहीबार हुने फाइनल खेल फिफा विन्डोपछि हुने भएकाले उनी फाइनल खेलमा उपलब्ध नहुने भएकी हुन् ।