काठमाडौंमा जारी त्रिकोणात्मक अन्तर्राष्ट्रिय ट्वान्टी–२० क्रिकेट​ शृङ्खलाअन्तर्गत बिहीवार भएको खेलमा नेदरल्यान्ड्सले नामिबियालाई ५९ रनले पराजित गरेको छ । 

माइकल लेभिट र साइब्रान्ड एङ्गेलब्रेख्तको उत्कृष्ट ब्याटिङमा नेदरल्यान्ड्सले नामिबियालाई जीतका लागि २४८ रनको लक्ष्य दिएको थियो । जवाफमा नामिबिया निर्धारित २० ओभरमा सात विकेट गुमाउँदै १८८ रनमा समेटियो । 

नामिबियाका लागि जान फ्रिलिङक र जान ग्रिनले समान ४२–४२ रनको योगदान दिए । त्यसैगरी जेपी कोटेजले २६ रन जोड्दा जेजे स्मिथ र रुबेन ट्रम्पलम्यानले समान १९-१९ रन बनाए । 
    
बलिङतर्फ नेदरल्यान्ड्सका टिम भान डर गुगटेनले दुई विकेट लिए भने याब्रान्ड एंगेलब्रेक्ट, रोलेफ भान डर मर्वेल, भिभियन किंग्मा र आर्यन दत्तले समान एक–एक विकेट हात पारे ।

त्यसअघि कीर्तिपुरस्थित त्रिवि क्रिकेट मैदानमा टस जितेर पहिला ब्याटिङ रोजेको नेदरल्यान्ड्सले निर्धारित २० ओभरमा पाँच विकेट गुमाउँदै २४७ रनको योगफल बनाएको थियो । नेदरल्यान्ड्सका लागि माइकल लेभिटले ६२ बलमा ११ चौका र १० छक्काको मद्दतले सर्वाधिक १३५ रनको योगदान दिएका थिए । त्यसैगरी साइब्रान्ड एङ्गेलब्रेख्तले ४० बलमा सात चौका र पाँच छक्काको मद्दतले ७५ रन जोडे । तेजा निदामनुरुले १८ रन बनाए ।

दोस्रो विकेटका लागि लेभिट र एङ्गेलब्रेख्तले १९३ रनको साझेदारी गरेका थिए । नामिबियाका लागि रुबेन ट्रम्पलम्यानले दुई विकेट लिए भने जान फ्रेइलिङ्कले र बेन सिकोन्गोले समान एक–एक विकेट लिए ।

योसँगै नेदरल्यान्ड्सले दोस्रो जीत दर्ता गराएको छ । यसअघि भएको खेलमा नेदरल्यान्ड्सले घरेलु टोली नेपाललाई पराजित गरेको थियो । प्रतियोगिताअन्तर्गत शुक्रवार नेपालले नामिबियासँग खेल्नेछ ।