​​नागरिक उन्मुक्ति पार्टी(नाउपा)का संरक्षक रेशम चौधरीले संघ र प्रदेशमा सांसदहरूको संख्या घटाउनु पर्ने बताएका छन् ।

शनिवार साँझ बुटवलमा पत्रकारहरूसँग कुरा गर्दै नेता चौधरीले सांसद संख्या घटाउनुपर्ने प्रस्ताव अगाडि सारेका हुन् । साथै मन्त्री बनाउन पनि निश्चित मापदण्ड तोकिनुपर्ने उनले बताए ।

‘संघीय सांसद संख्या १०० मात्र भएको भए हुन्छ । २७५ सांसद राख्न हुँदैन । संघमा १०० राख्ने प्रदेशमा पनि घटाउनु पर्छ', उनले भने ।

स्थिर सरकार बनाएर लामो समय सरकार चलाउनका लागि कार्यकारी पद आवश्यक रहेको उनले बताए ।

'एउटा कार्यकारी पद हुनुपर्छ । त्यो राष्ट्रपति होस् चाहे प्रधानमन्त्री होस्’, उनले भने, 'दुई चार महिनाको प्रधानमन्त्री बनाउँदा जनताले दु:ख पाउने काम मात्र भएको छ ।'