प्रधानमन्त्री पुष्पकमल दाहाल प्रचण्डले प्रतिनिधिसभाबाट तेस्रोपटक विश्वासको मत पाएपनि उनलाई समर्थन गर्ने सांसदको संख्या भने घटेको पाइएको छ ।

यसअघि प्रचण्डले २०७९ पुस २६ गते पहिलोपटक विश्वासको मत लिएका थिए । त्यो बेला उनले २७५ मध्ये २६८ सांसदको समर्थन थियाे । सो समयमा नेपाली कांग्रेस, नेकपा (एमाले)सहित प्रायः सबै दलले प्रचण्डको पक्षमा मतदान गरेका थिए । नेपाल मजदुर किसान पार्टी (नेमकिपा) र राष्ट्रिय जनमोर्चाले मात्रै विपक्षमा मतदान गरेका थिए । 

बुधवार प्रतिनिधिसभामा भएको मत विभाजनमा प्रचण्डले १५७ मत पाएका छन् । पहिलाे पटकको तुलनामा यो पटक १११ सांसद संख्या घटेको हो । 

बुधवार विपक्षमा कांग्रेससहित ११० मत पर्यो । बहुमतका लागि १३८ मत आवश्यक पर्नेमा प्रचण्डले १९ मत बढी पाए । 

२६८ सांसद उपस्थित भएकोमा १ सांसदले पक्ष/विपक्ष कतै पनि मत दिएनन् ।

प्रचण्डलाई नेकपा एमाले, नेकपा (माओवादी केन्द्र), राष्ट्रिय स्वतन्त्र पार्टी (रास्वपा), जनता समाजवादी पार्टी (जसपा), नेकपा (एकीकृत समाजवादी), नागरिक उन्मुक्ति पार्टी र केही स्वतन्त्र सांसदले मत दिएका थिए । 

कांग्रेस, राष्ट्रिय प्रजातन्त्र पार्टी (राप्रपा), जनमत पार्टी, लोकतान्त्रिक समाजवादी पार्टी (लोसपा), नेमकिपा र राष्ट्रिय जनमोर्चाले विपक्षमा मतदान गरे । कांग्रेसले सरकारलाई दिएको समर्थन फिर्ता गरेपछि प्रचण्डले संसद्मा तेस्रोपटक विश्वासको मत लिएका हुन् । 

यसअघि प्रचण्डले २०७९ पुस २६ गते पहिलोपटक विश्वासको मत लिएका थिए । त्यो बेला प्रचण्डले २७५ मध्ये २६८ सांसदको समर्थन पाएका थिए ।

२०७९ चैत ६ गते प्रचण्डले दोस्रोपटक विश्वासको मत लिएका थिए । त्यो बेला प्रचण्डले संसद्का १७२ सांसदको समर्थन पाएका थिए । 

एमालेसहितका दलको समर्थनमा प्रचण्ड २०७९ पुस १० गते प्रधानमन्त्री नियुक्त भएका थिए ।