नेपाली कांग्रेसकी सांसद ईश्वरी न्यौपानेले सहकारी ठगीमा रवि लामिछानेमाथि छानबिन गर्न संसदीय समिति गठन गर्ने विषयमा किन डराएको भन्दै प्रश्न गरेकी छिन् । 

प्रतिनिधि सभाको बुधवारको बैठकमा न्यौपानेले स्वार्थ बाझिएका लामिछानेमाथि छानबिन गर्नै नहुने गरी उनी स्वर्गबाट आएका हुन् भन्दै प्रश्न उठाएकी हुन् ।  

‘चार वर्ष वर्ष प्रतिपक्षले सदन अवरोध गरोस्, सत्ता चलाइरहन्छौं भनेर गृहमन्त्रीले चेतावनी दिनुभयो । प्रमुख प्रतिपक्षीविना कसरी संसद चल्छ ? गृहमन्त्रीको जवाफ सुन्दा, बजेटको बेला उहाँलाई सदन चाहिएको छैन । तर हामीलाई चाहिएको छ । छानबिन समितिको गठनको माग हाम्रो छ । समिति नै गठन गर्न नहुने उहाँ स्वर्गबाट आउनुभएको हो ? किन डराउनुभएको हो ?’, न्यौपानेले प्रश्न गरिन्, ‘अब खुल्ने सदनमा छानबिन समिति गठन नभए सदन अवरोधको दोष हामीलाई उहाँ उहाँहरूलाई जान्छ । यो सदनमा प्रधानमन्त्रीले गृहमन्त्रीबारे प्रमाण छैन भन्नुभएको छैन । हामीसँग यथेष्ट प्रमाण छन् । न्यायाधीशले गर्नुपर्ने काम प्रधानमन्त्रीले गृहमन्त्रीको पक्षमा गर्नुभयो ।’

सहकारी ठगीमा दीपेश पुन पक्राउ पर्दा रवि लामिछानेलाई किन उन्मुक्ति भन्दै न्यौपानेले प्रश्न उठाएकी हुन् ।

‘प्रधानमन्त्री रविबारे प्रमाण छैन भन्नुहुन्छ । तर दिपेश पुन पक्राउ पर्ने, गृहमन्त्रीप्रति चुपचाप रहने कसरी हुन्छ ?’, न्यौपानेले भनिन्, ‘रविमाथि पहिलोपटक नागरिकताको विषय थियो । लाइन बसेर नागरिकता लिनुभयो । दोस्रोपटक सहकारीको रकम हिनामिना भयो । हामी प्रतिपक्षीमा, बस्छौं भन्नभयो । तर बुरुक्क उफ्रेर स्वार्थ बाझिएको गृहमन्त्रालय किन चाहियो ?’ उनले भनिन् ।