उपप्रधान एवं गृहमन्त्री रवि लामिछानेले आफू सरकारमा सहभागी भएर २ साताको बीचमा गरेको कामलाई जनाउ घण्टीको संज्ञा दिएका छन् ।

आइतबार गृहजिल्ला चितवन पुगेका रविले होली खेल्न भेला भएका शुभचिन्तकहरूलाई सम्बोधन गर्दै यस्तो बताएका हुन् ।

'सरकारमा सहभागी भएको २ हप्तामा गरेका काम देखिहाल्नुभयो,' रविले भने, 'सिंगो संसद् र सरकार नै रास्वपाको भयो भने के हुन्छ भनेर जनाउ घण्टी मात्र दिएका हौं ।'

उनले सरकारमा जान हतार भयो कि भन्ने चिन्ता नगर्न शुभचिन्तकलाई सुझाव दिए ।

'अहिले नै सरकारमा जानु हुँदैनथ्यो भनेर तपाईंहरूलाई काहीँ कतै डर हुन सक्छ,' रविले भने, 'जब हामी काम गर्नेछौं, तब तपाईं भन्नुहुनेछ हेर्नुस् हाम्रो घण्टी ।'

रवि चितवन- २ बाट निर्वाचित सांसद हुन् ।