पाकिस्तानको खैबर पख्तुनख्वा प्रान्तको बिशाम क्षेत्रमा मंगलबार चिनियाँ इन्जिनियरमाथि भएको आक्रमणको जिम्मेवारी अहिलेसम्म कुनै समूहले लिएको छैन । 

पाकिस्तान र चीन दुवैले यो हमलालाई ‘आतंकवादी’ घटना भनेका छन् । पाकिस्तानी अधिकारीहरूले घटनाको कडा निन्दा गरेका छन् । प्रधानमन्त्री शाहबाज सरिफले पनि चिनियाँ कूटनीतिज्ञहरूसँग भेट गरी दुःख व्यक्त गरेका छन् । चीनले आक्रमणको छानबिन गर्न माग गरेको छ ।

स्थानीय प्रहरीका अनुसार हमलामा पाँच चिनियाँ इन्जिनियर र एक पाकिस्तानी चालकको मृत्यु भएको थियो । 

पाकिस्तानमा चिनियाँ इन्जिनियर वा (चीन-पाकिस्तान इकोनोमिक करिडोर) परियोजनासँग सम्बन्धित व्यक्तिहरूलाई अतिवादी संगठनहरूले निशाना बनाएको यो पहिलो पटक होइन । पाकिस्तानमा चिनियाँ अधिकारी वा कामदारलाई कसले र किन निशाना बनाइरहेको छ?

चीनले पाकिस्तानमा ६२ अर्ब डलरको पुँजी लगानी गर्दै आएको छ, जसका कारण देशभर विभिन्न परियोजनामार्फत् सडक, बाँध, पाइपलाइन र बन्दरगाहको काम भइरहेको छ ।

बिशाममा मार्च २६ मा पनि हमला भएको थियो, त्यसपछि बस खाल्डोमा खसेको थियो । आक्रमण हुँदा चिनियाँ इन्जिनियर इस्लामाबादबाट आएर दासु बाँधमा काम गर्न जाँदै थिए । 

अप्रिल २०२२ मा, एक महिला आत्मघाती हमलाकारीले कराँची विश्वविद्यालयको चिनियाँ केन्द्रको अगाडि आफूलाई विस्फोट गराएकी थिइन् । जसमा तीन चिनियाँ शिक्षकको मृत्यु भएको थियो । 

सन् २०२१ मा पनि पाकिस्तान र चीनमा प्रतिबन्धित तहरीक-ए-तालिबान पाकिस्तान (टीटीपी) सँग सम्बन्धित दासु परियोजना नजिक चिनियाँ इन्जिनियरहरूको बसमा हमला भएको थियो । उक्त हमलामा नौ चिनियाँ नागरिकसहित १३ जनाको मृत्यु भएको थियो । यस मुद्दामा दुई जनालाई मृत्युदण्ड पनि दिइएको छ । बीबीसी हिन्दीको सहयोगमा