कायरो–इजिप्टका राष्ट्रपति अब्देल–फताह अल–सिसीद्वारा तेस्रो कार्यकालका लागि शपथ लिएका छन् । गत डिसेम्बरमा भएको निर्वाचनमा उनी पुनः राष्ट्रपतिमा निर्वाचित भएका थिए ।

इजिप्टमा संविधानअनुसार राष्ट्रपतिको कार्यकाल ६ वर्षको हुने गर्छ । राष्ट्रपति सिसीले नयाँ संसद् भवनमा शपथ लिएका हुन् ।

डिसेम्बरको निर्वाचनमा सिसीले झण्डै ९० प्रतिशत मत प्राप्त गरेका थिए । उनका विपक्षी उम्मेदवारले लगातार तेस्रो पटक खासै उल्लेखनीय मत प्राप्त गर्न सकेका छैनन् । करिब छ करोड ७० लाख मतदाता रहेको इजिप्टमा गत डिसेम्बरमा सम्पन्न चुनावमा करिब ६७ प्रतिशत मतदान भएको थियो ।

इजिप्टको पूर्वी सीमाक्षेत्रमा अवस्थित गाजामा इजरायल–हमास युद्ध भड्किएपछि डिसेम्बरको चुनाव पनि छायाँमा परेको थियो । उक्त युद्धको असर गाजासँगै छिमेकी मुलुक इजिप्टसम्म फैलिन सक्ने अनुमानबीच इजिप्टमा राष्ट्रपतिको चुनाव भएको थियो ।

अल–सिसी सन् २०१४ मा पहिलो पटक राष्ट्रपतिमा निर्वाचित भएका थिए । उनी सन् २०१८ मा दोस्रो कार्यकालका लागि विजयी भएका थिए । सन् २०१९ मा संविधान संशोधनपश्चात् अल–सिसीको कार्यकाल दुई वर्ष थप्नुका साथै तेस्रो कार्यकालका लागि चुनाव लड्न बाटो खोलिएको थियो । 

इजिप्टको राष्ट्रपतिमा अल–सिसीलाई चुनौती दिने कुनै उम्मेदवार चुनावी मैदानमा थिएनन् । राष्ट्रपतिका अन्य प्रतिस्पर्धीहरू चुनावी प्रचारमा समेत सहभागी भएका थिएनन् ।