लुम्बिनी प्रदेशमा नयाँ सरकार गठनका लागि चार राजनीतिक दल र एक स्वतन्त्र प्रदेशसभा सदस्यले पाँच बुँदे सहमति भएको छ । सहमतिपत्रमा नेकपा (माओवादी केन्द्र)का संसदीय दलका नेता जोखबहादुर महरालाई मुख्यमन्त्रीमा समर्थन गर्ने उल्लेख छ । 

माओवादीका महरा, नेकपा (एमाले) संसदीय दलका नेता लीला गिरी, जनता समाजवादी पार्टी (जसपा)का संसदीय दलका नेता भण्डारीलाल अहिर, नेकपा (एकीकृत समाजवादी)की नेता भगवती अधिकारी र नवलपरासी पश्चिम निर्वाचन क्षेत्र २ (१)बाट निर्वाचित स्वतन्त्र प्रदेशसभा सदस्य खड्ग बस्नेतको हस्ताक्षर छ । यससँगै मुख्यमन्त्रीमा महराको पक्षमा बहुमत जुटेको छ ।

प्रदेश सरकारबाट गरिने राजनीतिक नियुक्ति सरकारमा सहभागी दलहरूको अपनत्व हुने गरी गर्ने, प्रदेशको पहिचान कायम गर्ने, प्रदेश गौरवका आयोजनाहरू, प्रदेश राजधानीको निर्माण, लुम्बिनी प्रादेशिक अस्पताल, प्रदेश प्राविधिक विश्व विद्यालय, प्रदेश प्रहरी समायोजन र स्थानीय सेवा ऐन निर्माण सरकार साझेदार दलहरूको साझा प्राथमिकताको रुपमा कार्यान्वयन गर्ने, प्रदेश सरकारको नीति तथा कार्यक्रम, बजेटको प्राथमिकता र उद्देश्य निर्धारण गर्ने साझेदारी पत्रमा उल्लेख छ ।

यस्तै बजेट निर्माणलगायत सरकारलाई सहयोग गर्न सरकारमा सहभागी दलहरूको नेतृत्व पंक्तिमध्येबाट एक निर्देशक समिति निर्माण गरी कार्य सम्पादन गर्ने नीति अवलम्बन गर्ने पनि उल्लेख छ ।

जनताको सेवालाई सरकारको सर्वोपरी मान्दै राजनीतिक स्थायित्वसहित लुम्बिनी प्रदेश सरकारको स्थायित्व कायम राख्न पनि चार दल र स्वतन्त्र प्रदेशसभा सदस्य सहमत भएका छन् । महरा उनी रोल्पा १ (१)बाट निर्वाचित सांसद हुन् । उनले लामो समय माओवादी अध्यक्ष तथा प्रधानमन्त्री पुष्पकमल दाहालको सचिवालयमा बसेर काम गरेका थिए । 

लुम्बिनी प्रदेश सभामा ८७ सांसदमध्ये एक निलम्बनमा परेपछि अहिले ८६ जना छन् । मुख्यमन्त्री बन्नका लागि ४४ जना सांसद आवश्यक पर्छ । अहिलेसम्म महरालाई गठबन्धन दलबाट एमालेका २९, माओवादी सभामुखसहित ११, जसपाका ३, एकीकृत समाजवादीका एक र नवलपरासी २ (१)बाट निर्वाचित स्वतन्त्र सांसद खडक बस्नेतसहित ४४ सांसदले समर्थनमा हस्ताक्षर गरेका छन् । 

लुम्बिनीका मुख्यमन्त्री चौधरीले दिए राजीनामा, खुल्यो नयाँ सरकार बन्ने बाटो