लुम्बिनी प्रदेशको मुख्यमन्त्री डिल्लीबहादुर चौधरीले राजनीतिक अस्थिरताले संघीयतामाथि ग्रहण लागेको बताएका छन ।

बिहीवार मुख्यमन्त्रीबाट राजीनामा दिने क्रममा प्रदेशसभा बैठकलाई सम्बोधन गर्दै उनले प्रधानमन्त्री पुष्पकमल दाहाल प्रचण्डले मुलुकमा अस्थिरता ल्याउँदा देशमा संघीयता रहने वा नरहने भन्ने गम्भीर प्रश्न सिर्जना भएको बताए ।

‘प्रचण्डको फुत्त–फुत्त प्रवृतिले संघीयता रहन्छ कि रहँदैन भन्ने अवस्था आयो,’ चौधरीले भने, ‘हामी सकिने अवस्था आयौं । कहिले यता र उता प्रवृत्तिले संघीयतामा ग्रहण लागिसक्यो । व्यवस्था बचाउन सक्छौं कि सक्दैन भन्नेबारे गम्भीर पश्न आएको छ । तीन/तीन महिनामा सरकार फेरबदलका लागि संघीयता आएको होइन । हामीलाई डुबाउने र सक्ने अवस्था सिर्जना भएको छ ।’ 

संविधान र प्रदेशको औचित्य पुष्टि गर्न नसकेमा अहिलेसम्म हासिल गरेका जे–जति उपलब्धि गुम्न सम्नेतर्फ चौधरीले सचेत गराए । 

‘हामीले खाएको तलब÷भत्ता र चढेका गाडीको औचित्य पुष्टि हुन सकेको छैन । संविधान र प्रदेशको औचित्य पुष्टि गर्न सकेनौं भने हाम्रा उपलब्धि सकिने छन् । प्रदेशको औचित्य पुष्टि गर्न नसके हामीले के–का लागि माननीय ?’, उनले प्रश्न गरे ।

संघले प्रदेशलाई दिँदै आएको बजेटसमेत घटाउँदै लगेकोतर्फ संकेत गर्दै नेपाली कांग्रेसका संसदीय दलका नेतासमेत रहेका चौधरीले संघीयता कमजोर भएको जिकिर गरे । 

‘हामीले ४० अर्बको बजेट ल्याएका छौं । अब घटेर २८ अर्बमा आउँदैछ । त्यसमध्ये १० अर्ब प्रशासनिक खर्च हुन्छ । बाँकी १८ अर्बमा हामी खेलिरहेका छौं, रमाएका छौं । यसले संघीयता बलियो होइन कमजोर हुँदै गएको संकेत गरेको छ,’ उनले भने । 

लुम्बिनीमा गठबन्धनबीच ५ बुँदे सहमति, जुट्यो महराको पक्षमा बहुमत