लुम्बिनी प्रदेशको नयाँ मुख्यमन्त्री नेकपा (माओवादी केन्द्र) संसदीय दलका नेता जोखबहादुर महरा हुने भएका छन् । रोल्पा– १ (१)बाट निर्वाचित सांसद महराको पक्षमा नेकपा एमालेका २९, माओवादीका १० (सभामुख बाहेक), जनता समाजवादी पार्टी (जसपा)का ३, नेकपा (एकीकृत समाजवादी) र स्वतन्त्र १–१ जना सांसदले महरालाई मुख्यमन्त्रीमा समर्थन गरेर जाने सहमति भएको छ । 

अहिलेको अवस्थामा महराको पक्षमा संसद्को बहुमत ४४ मत कायम हुन्छ । गठबन्धनमा रहेका ४ दल र १ स्वतन्त्र सांसदले बिहीवार माओवादीका महरालाई मुख्यमन्त्री बनाउनेलगायत ५ बुँदे सहमति गरेका छन् ।

महरा लुम्बिनीमा माओवादीबाट दोस्रो र समग्र प्रदेशसभाको पाँचौ मुख्यमन्त्री बन्दैछन् । विसं २०७९ पुस ९ गते एमाले संसदीय दलका नेता लीला गिरी मुख्यमन्त्री हुँदा महरा झण्डै ३ महिना अर्थमन्त्री बनेका थिए । खासमा उनले प्रदेशसभाको दोस्रो कार्यकालमा पहिलो मुख्यमन्त्री बन्ने लक्ष्य राखेका थिए । तर त्यसमा उनी सफल भएका थिएनन् । अन्नतः उनले दोस्रो कार्यकालको तेस्रो सरकारको नेतृत्व गर्ने निश्चित भएको हो ।  

महराले लामो समय माओवादी अध्यक्ष तथा प्रधानमन्त्री पुष्पकमल दाहाल प्रचण्डको सचिवालयमा बसेर काम गरेका थिए । उनी प्रचण्डका विश्वासपात्र मानिन्छन् । २०७४ को फागुन ३ गते प्रदेशको पहिलो मुख्यमन्त्रीमा शंकर पोखरेल नियुक्त भएका थिए । एमाले र माओवादी एकीकृत भएर नेपाल कम्युनिस्ट पार्टी (नेकपा) भएका बेला बनेको उनको सरकार पार्टी विभाजनसँगै २०७८ साउनमा ढलेको थियो । त्यसलगत्तै साउन २८ गते नेपाली कांग्रेसको समर्थनमा माओवादी केन्द्रका संसदीय दलका नेता कूलप्रसाद केसी मुख्यमन्त्री नियुक्त भएका थिए ।

लुम्बिनी प्रदेशसभामा ८७ सांसदमध्ये १ जना निलम्बनमा परेपछि अहिले ८६ जना छन् । अहिलेसम्म महरालाई गठबन्धन दलबाट एमालेका २९, माओवादीका १०, जसपाका ३, एकीकृत समाजवादीका १ र नवलपरासी २ (१)बाट निर्वाचित स्वतन्त्र सांसद खडक बस्नेतसहित ४४ सांसदले समर्थनमा हस्ताक्षर गरेका छन् ।

महरालाई लोसपा र नागरिक उन्मुक्तिले पनि समर्थन गर्ने सम्भावना देखिएको माओवादी लुम्बिनी प्रदेश अध्यक्ष सुदर्शन बरालले बताए । उन्मुक्तिका ४, लोसपाका ३ जना सांसद छन् । यी थपिए महराको समर्थनमा ५१ जना पुग्छन् ।  लोसपाबाट सन्तोषकुमार पाण्डेय मुख्यमन्त्री डिल्लीबहादुर चौधरीको सरकारमा गृह तथा सरकारका प्रवक्ता छन् । मुख्यमन्त्री चौधरी गत वैशाख १४ गते लुम्बिनी प्रदेशसभामा सहभागी १० राजनीतिक दलमध्ये ८ दलका ५३ सांसदको समर्थन पाउँदै मुख्यमन्त्रीमा नियुक्त भएका थिए । चौधरीले बिहीवार संसद्मा सम्बोधन गर्दै राजीनामा दिइसकेका छन् ।

लुम्बिनीमा गठबन्धनबीच ५ बुँदे सहमति, जुट्यो महराको पक्षमा बहुमत