माछापुच्छ्रे बैंक लिमिटेडले नेपाल र भारतबीच क्रस बोर्डर भुक्तानी सहजीकरण गर्न नेपाल क्लियरिङ्ग हाउस र ‘फोन पे’सँग फरक–फरक सम्झौता गरेको छ ।

डिजिटल बैंकिङ्ग सेवालाई प्रभावकारी र सहज बनाउने उद्देश्यले विभिन्न योजनाहरू ल्याइरहेको बैंकले यी दुई कम्पनीसँग फरक–फरक सम्झौता गरेको हो ।

‘फोन पे’सँगको सम्झौताले नेपाल भ्रमणमा आउने भारतीय ग्राहकले यूपीआईमार्फत् आफूले प्रयोग गरेको सेवा तथा खरिद गरेको वस्तु तत्काल फोन पे  नेटवर्क आबद्ध माछापुच्छ्रे बैंकका मर्चन्टहरूमा सोझै भुक्तानी गर्न सक्ने बैंकले जनाएको छ ।

साथै नगद लेनदेन कारोबार हटाएर कयूआर भुक्तानीमार्फत सहज रुपमा कारोबार गर्न छ ।

यस्तै, भविष्यमा व्यापारी भुक्तानी च्यानललाई सहजीकरण गर्न नेपाल क्लियरिङ्ग हाउससँग बैंकले साझेदारी गरेको हो ।

सम्झौता अनुरूप उक्त सेवा लाइभ गए  पश्चात्  नेपालमा रहेका भारतीय नागरिकहरूले नेपाल राष्ट्र बैंकद्वारा तोकिएको सीमा पालना गर्दै माछापुच्छ्रे बैंकमा खोलिएको कुनै पनि यूपीआई ह्यान्डल–लिंक गरिएको खाताबाट भारतमा सिधा पैसा पठाउन सक्नेछन् ।

नेपाल राष्ट्र बैंकले तोकेको सीमाभित्र बसेर दैनिक १५ हजार भारतीय रुपैयाँ र मासिक १ लाखसम्म भारत पठाउन सहज हुने बैंकले जनाएको छ ।