आगामी वैशाख १५ गते हुने उपनिर्वाचनका लागि आज (शनिवार) उम्मेदवारी मनोनयन दर्ता हुँदैछ ।

इलाम–२ को प्रतिनिधिसभा र बझाङ प्रदेशसभा– १ मा हुने उपनिर्वाचनको लागि आज उम्मेदवारी दर्ता हुन लागेको हो ।

मुख्य निर्वाचन अधिकृतको कार्यालयमा बिहान १० बजेदेखि बेलुका ५ बजेसम्म उम्मेदवारको मनोनयन दर्ताको कार्यक्रम रहेको निर्वाचन आयोगले जनाएको छ ।

उम्मेदवारीमाथि चैत्र २५ गते बिहान १० बजेदेखि दिउँसो ३ बजेसम्म उम्मेदवारको विरोधमा उजुरी दिने समय तोकिएको छ ।

चैत्र २६ गते ६ बजेसम्म उम्मेदवारको नामावली प्रकाशन, चैत्र २७ गते बिहान ९ बजेदेखि दिउँसो १ बजेसम्म उम्मेदवारी फिर्ताका समय तोकिएको छ ।

२७ गते नै उम्मेदवारको अन्तिम नामावली प्रकाशन र उम्मेदवारलाई चुनाव चिन्ह प्रदान गर्ने कार्यक्रम रहेको आयोगले जनाएको छ ।

आगामी वैशाख १५ गते बिहान ७ देखि अपरान्ह ५ बजेसम्म मतदान हुनेछ ।

नेकपा (एमाले)का तत्कालीन उपाध्यक्ष सुवास नेम्वाङको निधनपछि इलाम–२ मा उपनिर्वाचन हुन लागेको हो । एमालेले उनकै छोरा सुहाङलाई उम्मेदवार बनाएको छ । 

नेकपा (माओवादी केन्द्र)ले इलाम–२ मा एमालेलाई सघाउने निर्णय गरेको छ ।

दुवै पार्टीका जिल्ला संयोजकले शुक्रवार विज्ञप्ति जारी गर्दै पार्टीको केन्द्रले गरेको निर्णयलाई औपचारिकता दिँदै एमालेका उम्मेदवार सुहाङ नेम्वाङलाई मतदान गर्न मतदातासँग अपिल गरेका छन् । 

‘आगामी वैशाख १५ गते हुन लागिरहेको इलाम–२ प्रतिनिधिसभा उपनिर्वाचनमा एमाले र माओवादी केन्द्रबीच एमाले केन्द्रीय अध्यक्ष केपी शर्मा ओली र माओवादी केन्द्र अध्यक्ष एवं प्रधानमन्त्री पुष्पकमल दाहाल प्रचण्डबीच चुनावी तालमेल गर्ने उच्चस्तरीय समझदारी भएकोले इलाम – २ मा नेकपा एमालेको उम्मेदवार सुहाङ नेम्वाङलाई साझा उम्मेदवारको रूपमा अत्यधिक बहुमतका साथ विजयी गराउनका लागि इलाम– २ का आम मतदातामा हार्दिक अपिल गर्दछौँ,’ विज्ञप्तिमा भनिएको छ ।

विज्ञप्तिमा एमाले जिल्ला अध्यक्ष महेश बस्नेत र माओवादी केन्द्रका जिल्ला संयोजक विजय खम्बुले हस्ताक्षर गरेका छन् ।

माओवादीले यसअघि नै इलाम–२ मा एमालेलाई सघाउने जनाएको थियो तर औपचारिक निर्णय भने भएको थिएन । 

इलाम–२ मा नेपाली कांग्रेसले डम्बरबहादुर खड्का र राष्ट्रिय स्वतन्त्र पार्टी (रास्वपा)ले मिलन लिम्बूलाई उम्मेदवार बनाएको छ । पहिचान पक्षधर डकेन्द्र लिम्बूले पनि स्वतन्त्र उम्मेदवारी दिएका छन् ।

मूलतः कांग्रेस, एमाले र रास्वपाबीच नै प्रतिस्पर्धा हुने अनुमान छ ।