आगामी वैशाख १५ गते इलाम–२ मा हुने उपनिर्वाचनमा एउटा नगरपालिका र तीनवटा गाउँपालिकाका सबै वडा पर्छन् । देउमाई नगरपालिका, फाकफोकथुम, माङसेबुङ र चुलाचुली गाउँपालिकाका सबै वडा यो क्षेत्रमा पर्छन् । इलाम नगरपालिकाको १ देखि ९, ११ र १२ गरी ११ वटा वडा यो क्षेत्रमा पर्छन् । माई नगरपालिकाको ६, ७ र ८ गरी तीनवटा वडा यो क्षेत्रमा पर्छन् ।

पालिकाका कसले कहाँ जितेका थिए ?
गत स्थानीय तहको निर्वाचनमा ११ वटा वडा पर्ने इलाम नगरपालिकामा कांग्रेसका केदार थापा मेयरमा विजयी भएका थिए । थापाले एमालेका धीरेन कुमार चेम्जोङलाई २५७८ मतान्तरले पराजित गरेका थिए । थापाले १३ हजार १६५ मत प्राप्त गर्दा एमालेका चेम्जोङको १० हजार ५८७ मत आएको थियो ।

वडातर्फ कांग्रेसले १, ४ देखि १० सम्मका ७ वटा र १२ गरी जम्मा ९ वटा वडा जितेको थियो ।  एमालेले २, ३ र ११ गरी तीनवटा मात्रै वडाध्यक्षमात्रै जितेको थियो । कांग्रेसले अधिकांश वडाध्यक्ष फराकिलो मतान्तरसहित जितेको थियो । 

देउमाई नगरपालिकामा एमाले एक हजार मतान्तरले मेयरमा विजयी भएको थियो । एमालेका सूर्यप्रसाद पोखरेल ८ हजार ६९५ मतले विजयी हुँदा कांग्रेसका होमप्रसाद दुलालले ७ हजार ६२२ मत प्राप्त गरे । 

वडाध्यक्षतर्फ एमालेले १, २, ४, ५ र ८ गरी ५ वटा वडा जितेको थियो । ३, ६, ७ र ९ गरी ४ वटा वडा कांग्रेसले जितेको थियो । चुलाचुली गाउँपालिका अध्यक्षमा कांग्रेसले एमालेलाई २ हजार ८९५ मतान्तरले पराजित गरेको थियो । अध्यक्षमा राजेन्द्र केरुङ ६ हजार ६५० मत ल्याएर विजयी हुँदा एमालेका ओमनारायण खनाल ३७५५ मत ल्याएका थिए । नेकपा एसका  नारायण लावतीको  ५०५ आएको थियो । 

वडाध्यक्षतर्फ १ मा संघीय लोकतान्त्रिक राष्ट्रिय मञ्चले जित्दा २ देखि ६ नम्बरसम्मका ५ वटा वडामा कांग्रेसले सहजै वडाध्यक्ष जितेको थियो । फाकफोकथुममा एमालेले ५ सय मतान्तरले पालिकामा जित्न पुगेको थियो । अध्यक्षमा जितेका एमालेका दीपेन्द्र खनालले ५ हजार ३२२ र पराजित कांग्रेसका डिकबहादुर थापाले ४ हजार ८२१ मत प्राप्त गरेका थिए । 

वडाध्यक्षतर्फ कांग्रेसले १, २, ४ र ७ गरी ४ वटा वडा जितेको थियो । एमालेले ३, ५ र ६ र गरी तीनवटा वडा जितेको थियो । माङसेबुङ पालिकामा एमालेले ३ सय मतान्तरले जितेको थियो । अध्यक्षमा एमालेका हेमन्त राईले ३ हजार ८१८, कांग्रेसका डिकेन्द्र इदिङगोले ३ हजार ४९५ मत प्राप्त गरेका थिए । वडाध्यक्षतर्फ एमालेले १, २, ४ र ६ गरी ४ वटा वडा जित्न पुगेको थियो । ३ नम्बर वडा माओवादीले जित्दा ५ भने राष्ट्रिय जनमुक्ति पार्टीले जितेको थियो ।