ओमनमा जारी एसीसी प्रिमियर कप क्रिकेटमा नेपालले लगातार दोस्रो जीत हात पारेको छ । शनिवार भएको दोस्रो खेलमा नेपालले कतारलाई ३२ रनले पराजित गरेको हो ।

नेपालले दिएको २११ रनको लक्ष्य पछ्याएको कतारले निर्धारित २० ओभरमा ९ विकेट गुमाउँदै १७८ रन मात्र बनाउन सक्यो । कतारका लागि कप्तान मोहम्मद तनवीरले सर्वाधिक ६३ रन जोडेपनि जीतका लागि पर्याप्त भएन ।

बलिङमा नेपालका ललित राजवंशी, दीपेन्द्रसिंह ऐरी र गुल्सन झाले दुई–दुई, अभिनाश बोहरा र कुशल मल्लले एक–एक विकेट लिए 

यसअघि कतारलाई नेपालले २११ रनको लक्ष्य प्रस्तुत गरेको थियो ।

टस जितेर पहिला ब्याटिङ गरेको नेपालले निर्धारित २० ओभरमा ७ विकेट गुमाउँदै २१० रन बनाएको हो ।

नेपालका दीपेन्द्रसिंह ऐरीले एकै ओभरमा ६ वटा छक्का प्रहार गरेका थिए । उनले अर्धशतकीय पारी खेल्दै सर्वाधिक ६४ रन जोडे । उनले अन्तिम ओभरमा ६ छक्का प्रहार गरेका हुन् ।

दीपेन्द्र २१ बलमा ६४ रन बनाएर अविजित रहे । उनले ७ छक्का र ३ चौका प्रहार गरे ।

यस्तै आशिफ शेखले पनि अर्धशतकीय पारी खेल्दै ५२ रन बनाए । 

यसैगरी कुशल मल्लले ३५, कप्तान रोहित पौडेलले १८, सन्दीप जोराले ७, कुशल भुर्तेलले १२, गुल्सन झाले ५ र विवेक यादवले ५ रनको योगदान दिए ।

यसअघि शुक्रवार भएको पहिलो खेलमा नेपालले मलेसियालाई ५ विकेटले हराएको थियो ।