भारतमा जारी इन्डियन प्रिमियर लिग (आईपीएल) क्रिकेटमा राजस्थान रोयल्सले पञ्जाब किंग्सलाई ३ विकेटले पराजित गरेको छ । शनिवार साँझ मोहालीमा पाहुना टोली राजस्थानका कप्तान सञ्जु सामसनले टस जितेर पहिले फिल्डिङ गर्ने निर्णय लिएका थिए ।  

जसलाई उनका बलरहरूले सही साबित गर्दै घरेलु टोली पञ्जाबलाई १४७ रनमा सीमित गरे । जवाफमा पाहुना टोलीले सुस्त शुरूवात गरेको थियो । तर अन्त्यमा सिमरोन हेटमायरको छोटो तर महत्वपूर्ण २७ रनको पारी खेल्दै राजस्थानलाई जीत दिलाए ।

नियमित कप्तान शिखर धवन बिना नै मैदान उत्रिएको पञ्जाबको ओपनिङ ब्याटिङमा जोनी बेयरस्टो र अथर्व तायडे आएका थिए । दुवै ओपनर १५–१५ रन बनाएर आउट भए । तेस्रो नम्बरमा ब्याटिङ गर्न आएका प्रभसिमरन सिंहले जम्मा १० रनमात्र बनाए । मध्यक्रममा कप्तान साम करणले ६ र जीतेश शर्माले १ चौका र २ छक्काको मद्दतले २९ रन बनाए । तल्लो अर्डरमा शशांक सिंहले ९ रन र लियाम लिभिङस्टोनले २१ रन बनाएर आउट भएका थिए ।

अन्तिममा पञ्जाबका आशुतोष शर्माले उत्कृष्ट ब्याटिङ गरे । आशुतोषले १६ बलमा १ चौका र ३ छक्का प्रहार गर्दै ३१ रन बनाए । राजस्थानका आभेष खान र केशव महाराजले २–२ विकेट लिए ।

१४८ रनको लक्ष्यको जवाफमा रोयल्सका लागि ब्याटिङको ओपनिङका लागि यशस्वी जैसवाल र तनुष कोटियान आए पनि दुवैबीच ८.२ ओभरमा ५६ रनको सुस्त साझेदारी भयो । तनुषले ३१ बलमा २४ रन बनाए । 

यसपछि यशस्वी जैसवालले पनि राम्रो सुरुवातलाई ठूलो पारीमा परिणत गर्न सकेनन् । जैसवाल २८ बलमा ३९ रन बनाएर आउट भए । सञ्जु सामसनले १८ रन, रियान परागले २३ रन र ध्रुव जुरेलले ८ रन जोडे ।

रोभम्यान पावेलले ५ बलमा ११ रनको छोटो तर महत्वपूर्ण इनिङ खेले भने अन्तिम ओभरमा सिमरोन हेटमायरले खेलको अन्त्य गरे । हेटमायरले १० बलमा १ चौका र ३ छक्का सहित २७ रन बनाए । पञ्जाबका लागि कागिसो रबाडा र साम कुरानले सर्वाधिक २–२ विकेट लिए ।

छैटौँ खेलमा पाँचौ जीतपछि राजस्थान १० अंकसहित अंक तालिकाको शीर्ष स्थानमा रहेको छ ।

यस्तै पराजित भएको पञ्जाब ४ अंकसहित आठौं स्थानमा छ । पञ्जाबले ६ खेल खेल्दा २ मा मात्र जीत हात पारेको छ ।