सुनसरी जिल्लाको बराहक्षेत्र नगरपालिका १ स्थित पिण्डेश्वर पूर्ण महाकुम्भ मेला परिसरमा अत्यधिक गर्मीका कारणले बेहोस भएका ४ जनको सशस्त्र प्रहरीले उद्धार गरेको छ ।

आइतवार साँझ उद्धार गरिएका चारै जनालाई प्रहरीले तत्कालै उपचारका लागि अस्पताल पठाएको प्रहरीले जनाएको छ ।

बराहक्षेत्रका १० की ३० वर्षिया रिना पोख्रेल, काठमाडौं ४५ वर्षीय अच्युत चौलागाईं, उदयपुर जिल्लाकी ५६ वर्षीया मन्जु खतिवडा र सर्लाही जिल्लाका ५० वर्षीय सन्तोष त्रिपाठी महाकुम्भ मेला जाने क्रममा अचानक बेहोस भएका थिए ।

उनीहरू बेहोस भएको सूचना पाएपछि सुरक्षा बेस चतराबाट खटिएको ११ जनाको विपद् उद्धार टीमले उद्धार गरी सशस्त्र प्रहरी बलद्वारा संचालित अस्थायी स्वास्थ्य शिविरमा प्राथमिक उपचार गरेको थियो ।

त्यसपछि थप उपचारका लागि चतरा अस्पताल पठाइएको सह-प्रवक्ता समेत रहेका सशस्त्रका डीएसपी शैलेन्द्र थापाले जानकारी दिए ।

गत चैत २७ देखि यही वैशाख २८ गतेसम्म सञ्चालन हुने महाकुम्भ मेलामा सशस्त्र प्रहरी बलले मेला अवधिभर निःशुल्क स्वास्थ्य शिविरसहित विपद् उद्धार टीम परिचालन गरेको छ ।