प्रथम अन्तरप्रदेश राष्ट्रिय खेलकुद प्रतियोगिता अन्तर्गत पौडी खेलमा बागमती प्रदेशले २७ स्वर्ण १९ रजतसहित ५३ पदक प्राप्त गरेको छ ।

चितवनमा हालै सम्पन्न प्रतियोगिता अन्तर्गत भएका २६ इभेन्टमा पौडीतर्फ बागमतीको वर्चस्व रहेको हो । बागमती प्रदेश आयोजक रहेको प्रतियोगितामा ७ वटै प्रदेश सहभागी थिए । 

कुल ३० स्वर्ण मध्ये बागमती एक्लैले २७ पदक पाउँदा सुदूरपश्चिमले ३ प्राप्त गरेको छ । ३० रजत मध्ये बागमतीले १९, सुदुरपश्चिमले ८ र कोशीले ३ पदक प्राप्त गरे । बागमतीले ७ कास्य पदक पनि प्राप्त गरेको छ । 

प्रशिक्षक रत्नलाल महर्जनको नेतृत्वमा बागमती प्रदेशले पौडीमा उत्कृष्ट प्रदर्शन गरेको हो । महर्जनले 'बेष्ट कोच अवार्ड' प्राप्त गरेका छन् । 

नेपाल पौडी संघका अध्यक्ष अशोक बज्राचार्यले पुरस्कृत खेलाडीलाई पदक वितरण गरेका थिए । बागमती प्रदेशबाट १५ पुरुष र १० महिला खेलाडी प्रतियोगिता सहभागी भएका थिए । 

बागमती प्रदेश सामाजिक विकास मन्त्रालय अन्तर्गतको प्रदेश खेलकुद विकास परिषद्‌ले आयोजना गरेको प्रतियोगिताको प्रधानमन्त्री पुष्पकमल दाहाल 'प्रचण्ड'ले चैत २५ गते उद्‌घाटन गरेका थिए ।