मधेश प्रदेशको प्रदेशसभामा हानाहान भएको छ । यसअघि १० मिनेटका लागि स्थगित गरिएको बैठक झण्डै ५ घण्टापछि सुचारु हुँदा तनाबको स्थिति पैदा भएको हो ।

यस क्रममा मुख्यमन्त्री सरोजकुमार यादवलाई लक्षित गरी प्रतिपक्षी दल जनमत पार्टीका सांसदले माइक प्रहार गरेका छन् । तर संयोगवश त्यो माइक मुख्यमन्त्रीलाई नलागेको बताइएको छ ।

बैठकमा माइक हान्ने मात्र नभएर कुर्सी र सीसीटीभी क्यामरामा समेत तोडफोड भएको एक सांसदले बताए ।

राजविराजमा मन्त्रीमाथि भएको हमलाको संसदीय छानबिन समिति घोषणा र मुख्यमन्त्रीको राजीनामा माग्दै जमनत पार्टीका सांसदहरूले प्रदेशसभाभित्रै प्रदर्शन गरेका थिए । जनमतको मागमा नेपाली कांग्रेस र लोकतान्त्रिक समाजवादी पार्टी (लोसपा)का सांसदहरूले पनि समर्थन गरेका छन् ।

तर सदन अवरोध गरेको बेला मुख्यमन्त्री यादवले जबरजस्ती प्रस्ताव पेश गर्न लाग्दा विवाद भएको प्रतिपक्षीको भनाइ छ ।

लोसपाले सरकारलाई दिएको समर्थन फिर्ता लिएको छ ।