एसीसी प्रिमियर कप २०२४ अन्तर्गत आफ्नो समूह चरणको अन्तिम खेलमा नेपाली राष्ट्रिय क्रिकेट टोलीले आज (बुधबार) साउदी अरबसँग खेल्दैछ । दुई देशबीचको खेल नेपाली समयानुसार दिउँसो ११ : ४५ बजे शुरू हुनेछ ।  

समूह चरणको अन्तिम खेलअगावै नेपाल सेमिफाइनलमा प्रवेश गरिसकेको छ । सोमबार समूह चरणको आफ्नो तेस्रो खेलमा हङकङविरुद्ध आठ विकेटको सहज जीत निकालेसँगै नेपालले अन्तिम खेलअगावै सेमिफाइनल पुगेको हो । 

शनिबार कतारविरुद्ध ३२ रनको जित निकालेको नेपालले त्यसअघिको खेलमा मलेसियालाई पाँच विकेटले हराएको थियो ।

नेपाल ६ अंकसहित तालिकाको शीर्ष स्थानमा छ । 

४ खेल खेलेको कतार ४ अंकसहित दोस्रो स्थानमा छ। साउदी, मलेसिया र हङकङको समान ३ खेलबाट २ अंक छ । 

समूह ‘ए’ अन्तर्गत नै आज नेपाल र साउदी भिड्दा सोही समयमा नै मलेसिया र हङकङ खेल्नेछन् । नेपालबाहेक अन्य टोलीको अघिल्लो चरण यात्रा नेट रनरेटमा भर पर्नेछ ।