शनिबार सम्पन्न इलाम क्षेत्र नम्बर २ को उपनिर्वाचनमा ६० प्रतिशत मत खसेको छ । 

एक लाख १५ हजार ८८९ मतदातामध्ये ६९ हजार २८७ जनाले मतदान गरेको मुख्य निर्वाचन अधिकृतको कार्यालयले जनाएको छ । यसअघि ५७ प्रतिशत मत खसेको प्रारम्भिक अनुमान रहेको थियो । अहिले फेरि ३ प्रतिशत बढेर आधिकारिक तथ्यांक सार्वजनिक भएको छ ।

मतदान गर्नेमा ३५ हजार १३५ पुरुष, ३४ हजार १५० महिला र २ जना अन्य छन् । महिलाको तुलनामा मतदान गर्ने पुरुषको संख्या ९८५ जना बढी छ । प्रतिनिधिसभातर्फको यो उपनिर्वाचनमा यो क्षेत्रमा १९ उम्मेदवार चुनावी मैदानमा छन् । 

मुख्य निर्वाचन अधिकृतको कार्यालयले दिएको जानकारी अनुसार मतपेटिका संकलन गरेपछि शनिबार रातिदेखि नै मतगणना गरिनेछ ।

मतपेटिका भेला गरी सकेपछि सर्वदलीय बैठक बसेर मतगणनाको निर्णय गर्ने तयारी छ ।