इलाम २ मा मतगणनामा ढिलाइ हुने देखिएको छ । यसअघि शनिबार राति करिब १०-११ बजेपछि मतगणना शुरू हुनसक्ने सम्भावना रहेकोमा अब त्यो पछि सर्ने देखिएको छ ।

मतगणनाअघि सर्वदलीय बैठक बस्ने कुरा थियो । यसमा नेकपा (एमाले)ले असहमति जनाइरहेको छ । 

एमालेका लागि इलामका चुनावी कमाण्डर कृष्ण काफ्लेले आइतबारदेखि मात्रै मतगणना गर्न आफूहरूले चाहिरहेको लोकान्तरलाई बताए ।

यद्यपि, इलामका प्रमुख जिल्ला अधिकारी (प्रजिअ) इन्द्रदेव यादवले भने शनिबार रातिदेखि नै मतगणना गर्ने बताइरहेका छन् । अर्कोतिर सुरक्षा अधिकारी भने राति २ बजे मात्रै सबैतिरको मतपेटिका सदरमुकाममा आइपुग्ने अवस्था रहेको बताउँछन् । मतगणना शुरू गर्नुअघि सर्वदलीय बैठक पनि बस्नुपर्ने हुन्छ । यस्तोमा राति नै मतगणना शुरू हुनेमा आफू विश्वस्त नरहेको ती सुरक्षा अधिकारीले लोकान्तरलाई बताए ।

मुख्य निर्वाचन अधिकृतको कार्यालयले दिएको जानकारी अनुसार मतपेटिका संकलन गर्ने काम भने अहिले भइरहेको छ ।

शनिवार साँझ ५ बजे सम्पन्न इलाम २ को प्रतिनिधिसभा उपनिर्वाचनमा ६० प्रतिशत मत खसेको छ । 

एक लाख १५ हजार ८८९ मतदातामध्ये ६९ हजार २८७ जनाले मतदान गरेको मुख्य निर्वाचन अधिकृतको कार्यालयले जनाएको छ । 

मतदान गर्नेमा ३५ हजार १३५ पुरुष, ३४ हजार १५० महिला र २ जना अन्य छन् । महिलाको तुलनामा मतदान गर्ने पुरुषको संख्या ९८५ जना बढी छ ।

प्रतिनिधिसभातर्फको यो उपनिर्वाचनमा यो क्षेत्रमा १९ उम्मेदवार चुनावी मैदानमा छन् ।