विभागीय टोली आर्मी क्लबले छैटौँ साहना प्रधान स्मृति राष्ट्रिय महिला हक्की प्रतियोगिताको उपाधि जितेको छ ।

मङ्गलवार भएको फाइनल खेलमा आर्मीले गण्डकी प्रदेशलाई ४-१ गोल अन्तरले हराउँदै उपाधि जित्न सफल भएको हो । 

धुलिखेल खेल मैदानमा आर्मीलाई जित दिलाउन सरस्वती तामाङले दुई गोल गरिन् । सीमा खड्का र कमला चन्दले एक एक गोल गरिन् । 

उता गण्डकीका लागि सीता माया बलले एक गोल फर्काइन् । आर्मीका लागि खेलको चौथो मिनेटमा सरस्वतीले गोल गर्दै टिमलाई अग्रता दिलाइन् ।

उता गण्डकीका लागि खेलको १६औँ मिनेटमा सीताले  गोल गर्दै टिमलाई बराबरीमा ल्याइन् । खेलको १८औँ मिनेटमा सरस्वतीले गोल गर्दै आर्मीलाई २-१ गोलको अग्रता दिलाइन् । 

खेलको २४औँ मिनेटमा कमलाले गोल गर्दै टिमलाई ३-१ गोलको अग्रता दिलाइन् । खेलको ५७औँ मिनेटमा सिमाले गोल गर्दै आर्मीलाई उपाधि दिलाउन सफल भइन् । 

फाइनल खेलको प्लेअर अफ द म्याच कमला चन्द चुनिन्।

उपाधिसँगै आर्मीले एक लाख रुपैयाँ प्रप्त गरेको छ । दोस्रो हुने गण्डकीले ७५ हजार प्राप्त गरेको छ । 

आज तेस्रो स्थानका लागि भएको खेलमा सुदूरपश्चिम प्रदेशले मधेस प्रदेशलाई १-० गोल अन्तरले हराउँदै तेस्रो स्थान हासिल गर्यो । 

सुदूरपश्चिम प्रदेशका लागि खेलको २७औँ मिनेटमा बबिता उराउले गोल गर्दै टिमलाई जित दिलाउन सफल भइन् । 

त्यस्तै प्रतियोगितामा विभिन्न विधामा उत्कृष्ट हुने खेलाडीहरूले जनही १० हजार पुरस्कार प्राप्त गरेका छन् ।

प्रतियोगितामा सर्वाधिक १० गोल गरेकी आर्मीकी सरस्वती वेस्ट स्कोरर हुन सफल भइन । 

प्रतियोगिताका इमर्जिङ प्लेअर सुदूरपश्चिम प्रदेशकि नमिता एसके  चुनिन् । वेस्ट गोलकिपरमा गण्डकीकी गोमा परियार, वेस्ट डिफेन्डरमा आर्मीकी सरिता मेचे र आर्मीकै निलिमा पाण्डे प्लेअर अफ द टुर्नामेन्ट चुनिन् । 

प्रतियोगितामा नेपाल आर्मी, बागमती प्रदेश, गण्डकी प्रदेश, लुम्बिनी प्रदेश, मधेस प्रदेश र सुदूरपश्चिम प्रदेश गरी ६ टिमको सहभागिता रहेको थियो ।