भारतमा जारी इन्डियन प्रिमियर लिग (आईपीएल) क्रिकेटमा रोयल च्यालेन्जर्स बेंग्लोरले अर्को जीत निकाल्ने क्रममा गुजरात टाइटन्सलाई ४ विकेटले हराएको छ ।

पछिल्ला खेलमा लगातार जीत निकालेपछि बेंग्लोरको प्ले अफमा पुग्ने सम्भावना कायमै रहेको छ । शनिबार राति भएको खेलमा गुजरातलाई  पराजित गरेपछि बेंग्लोर तालिकाको सातौं स्थानमा उक्लिएको छ ।

हारसँगै गुजरात भने तालिकाको नवौं स्थानमा झरेको छ ।  

अब बाँकी रहेका तीन खेल जितेमा बेंग्लोरले प्ले अफको दाबेदारी प्रस्तुत गर्नेछ । शनिबार चिन्नस्वामी रंगशालामा घरेलु टोली बेंग्लोरका कप्तान कप्तान फाफ डू प्लेसिसले टस जितेर पहिले फिल्डिङ गर्ने निर्णय गरेका थिए ।

उनको यो निर्णयलाई बलरहरूले पावर प्लेमा नै सही साबित गरेका थिए । खराब शुरूवातपछि गुजरातले बेंग्लोरलाई १४८ रनको लक्ष्य दिएको थियो । उक्त लक्ष्य बेंग्लोरले ६ विकेट गुमाएर १३.४ ओभरमा पूरा गरेको थियो ।

कप्तान प्लेसिसले ६४ र विराट कोहलीले ४२ रन बनाए । उनीहरूले ३५ बलमा ९२ रनको साझेदारी गर्दै जीतको आधार तयार पारे ।

आईपीएलमा आज पञ्जाव किंग्स र चेन्नाई सुपर किंग्स तथा लखनऊ सुपर जायन्ट्स र कोलकाता नाइट राइडर्स आमने–सामने हुनेछन् । पहिलो खेल पौने ४ बजे तथा दोस्रो खेल राति पौने ८ बजे शुरू हुनेछ ।