कार्टुनिस्ट क्लब नेपालले  ‘विश्व कार्टुनिस्ट दिवस’ मनाएको छ। नेपाल ललितकला प्रज्ञा प्रतिष्ठानमा आयोजित कार्यक्रममा  पूर्व मन्त्री एवं पुराना कार्टुनिस्ट रमेशनाथ पाण्डेले छोटो समयमै नै पढ्न, बुझ्न र हाँस्ने सकिने कार्टुन विधा पहिला पहिला तयार गर्न गाह्रो भए पनि आज भोलि समय र परिस्थिति जटिल भएको बताए । 

उनले पत्रकारितामा कार्टुनको विशेष स्थान हुने भएकोले कार्टुनिस्टहरुको पनि विशेष दायित्व र महत्त्व हुने बताए । 

यस्तै क्लबका निवर्तमान अध्यक्ष अविन श्रेष्ठले आफ्ना आमाबुबाको नाममा स्थापना गरेको शारदा–गोविन्दमान ब्यङ्ग्यचित्र प्रतिभा पुरस्कार २०८१ हिमालयन टाइम्सका महेश बस्ताकोटीलाई प्रदान गरियो । उक्त पुरस्कारको राशि १० हजार रुपैयाँ रहेको छ । 

पुरस्कारबारे बोल्दै अविन श्रेष्ठले तीन दशक भन्दा बढी कार्टुन बनाइ सकेपछि आफ्नो मात्रै प्रगति भन्दा पनि नयाँ प्रतिभालाई हौसला प्रदान गर्न एउटा कार्टुनिस्टले अर्को कार्टुनिस्टलाई कार्टुनकै बारेमा पुरस्कार दिन उचित हुने भएकाले नयाँ पुरस्कार प्रदान गरेको बताए । 

उक्त कार्यक्रममा क्लबका अध्यक्ष बासु क्षितिजले पुरस्कारको छनौट प्रक्रियाबारे प्रस्ट पर्दै अग्रजहरूलाई धन्यवाद सहित सम्पूर्णमा कार्टुनिस्ट दिवसको शुभकामना दिए । कार्यक्रममा कार्टुनिस्ट राजेश केसीले नेपाली कार्टुनको इतिहासमा अविन श्रेष्ठको योगदान अतुलनीय रहेको र यो पुरस्कार स्थापनाले उनको योगदान अझै बढेको बताए । 

उक्त कार्यक्रममा ललितकलाका कुलपति नारदममणि हार्तम्छालीले भविष्यमा कार्टुनिस्ट दिवस मनाउनेबारे क्लबसंग छलफल गरेर अगाडि बढ्ने बताए । यस्तै कार्यक्रममा रवि मिश्रलगायतको पनि सहभागिता रहेको थियो ।