राष्ट्रिय स्वतन्त्र पार्टी (रास्वपा)का सभापति रवि लामिछानेले आफूलाई कांग्रेसले प्रधानमन्त्रीको अफर गरेको दोहोर्‍याएका छन् ।

यसअघि रास्वपाका अन्य नेताले रविलाई प्रधानमन्त्रीको अफर गरेको बताए पनि स्वयं रविले यसबारे बोलेका थिएनन् ।

संसद् गतिरोध अन्त्यका लागि सभामुख देवराज घिमिरेले मंगलवार बोलाएको सर्वदलीय बैठकपछि पत्रकारसँगको कुराकानीमा लामिछानेले उपप्रधानमन्त्री भन्दा माथिल्लो अफर (प्रधानमन्त्री) अस्वीकार गरेको दाबी गरेका हुन् । 

‘आफ्नो अफर मान्यो भने माथिल्लो पदका लागि विभिन्न च्यानलबाट कुरा ल्याउने । नमानेपछि भोलि पल्टदेखि गृहमन्त्रीमाथि छानबिनको कुरा उठाउने ?’ लामिछानेले प्रश्न गरे । रास्वपा नेताहरूले प्रधानमन्त्री अफर गरिएको दावी गरे पनि कांग्रेस नेताले अप्रमाणित कुरा गरेको बताएका छन् । 

फागुन २१ गते प्रधानमन्त्री पुष्पकमल दाहाल प्रचण्डले कांग्रेससँगको समीकरण बदलेर एमालेसहितको सरकार बनाएका थिए । सोही समयमा रविलाई कांग्रेसले प्रधानमन्त्री अफर गरेको चर्चा चलेको थियो । 

फागुन ३० गते प्रतिनिधि सभा बैठकमा कांग्रेस महामन्त्री विश्वप्रकाश शर्माले प्रधानमन्त्री अफर भएको भए ‘नाई मलाई तिनै युवती चाहिन्छ’, शैलीमा किन गृहमन्त्री खाएको भनेर प्रश्न गरेका थिए । 

विगतमा गरिएको प्रधानमन्त्रीको अफर फेरि पनि आउन सक्ने रविले दाबी गरे । अहिले फेरि प्रधानमन्त्रीको अफर आएको हो ? भन्ने पत्रकारको प्रश्नको जवाफमा रविले भने ‘नयाँ पनि आउला नि !’

सहकारी ठगीमा रविको संलग्नता रहेको भन्दै कांग्रेसले संसदीय छानबिनको कुरा उठाइरहेको छ ।

संसदीय छानबिन समिति नबने वैशाख २८ गते शुरु हुने संसद् अधिवेशनका बैठक अवरुद्ध गर्ने कांग्रेसले चेतावनी दिएको छ ।

कांग्रेसको अडानमा कारण सभामुखले बोलाएको बैठक सहमतिमा पुग्न सकेन ।