मोदीले मुस्लिम समुदायलाई भने– भाजपा कार्यालय कब्जा गर्नुहोस्, कसैले रोक्दैन

भारतका प्रधानमन्त्री नरेन्द्र मोदीले आफ्नो दल पार्टी भारतीय जनता पार्टी (भाजपा)सँग मुस्लिम समुदाय डराउनु नपर्ने बताएका छन् । 

भारतमा जारी लोकसभाको निर्वाचनको बीचमा टाइम्स नाउलाई अन्तर्वार्ता दिने क्रममा उनले मुस्लिम समुदायले आफ्नो पार्टीलाई सहयोग गर्नुपर्ने बताए । 

’म मुस्लिम समुदायलाई भन्न चाहन्छु, कसैले तपाईंलाई भाजपाको डर देखाइरहेको छ त्यसको विश्वास नगर्नुस्,’ उनले भने, ’यदि भाजपासँग डर लाग्छ भने नेताहरूसँग उठबस गर्नुस् । जानुस, भाजपाको कार्यालयमा बस्नुस्, कसले निकाल्छ ? कार्यालय नै कब्जा गर्नुस् न ।’ 

उनले भारतीय राष्ट्रिय कंग्रेसले सरकारको नेतृत्व गरेको बेलामा मुस्लिम समुदायलाई कुनै फाइदा नपुगेको आरोप लगाए । 

’म मुस्लिम समाजलाई भन्छु आत्ममन्थन गर्नुस् । देश अघि बढिरहेको छ, तपाईंहरू पनि अघि बढ्नुस्,’ उनले भने, ’कंग्रेसको पालामा सरकारबाट तपाईंहरूले किन फाइदा पाउनुभएन भन्ने सोच्नुस् ।’ 

मोदीले मुस्लिम देशमा योगा पाठ्यक्रममै राखेर विद्यार्थीलाई पढाइने गरेको तर भारतमा भने योगालाई लिएर धार्मिक विखण्डन हुने गरेको दुःखेसो पोखे ।

’साउदी अरेबियाको पाठ्यक्रममा योगा पढाइ हुन्छ,’ उनले भने, ’यहाँ मैले योगाको विषयमा बोल्ने हो भने हिन्दू–मुस्लिमको विवाद अघि सारिन्छ ।’

उनले यस्तो प्रवृत्तिविरुद्ध लड्न मुस्लिम समुदायलाई आग्रहसमेत गरे ।