नेपाल मजदुर किसान पार्टीका अध्यक्ष नारायणमान बिजुक्छेले देश निर्माणका लागि युवा  र विद्यार्थीलाई राजनीतिमा ल्याउनुपर्ने बताएका छन् । 
    
आज भक्तपुर नगरपालिकाले आयोजना गरेको भक्तपुरको कला, संस्कृति, इतिहाससम्बन्धी कार्यशालामा उनले इतिहास, संस्कृतिका विद्यार्थीले नेपाल र विभिन्न देशको इतिहास अध्ययन गर्नुपर्ने बताए। त्यसका लागि युवाहरु राजनीतिमा आउनुपर्ने उनको आग्रह थियो ।
    
उनले मानव सभ्यताको सम्पत्तिका रुपमा रहेको भक्तपुरको सांस्कृतिक सम्पदा जोगाउने अभियानलाई निरन्तरता दिनुपर्नेमा जोड दिए । विदेशीसँग माग्ने प्रवृत्तिले देशलाई झन कमजोर र परनिर्भर बनाएको उनको भनाइ थियो । उनले भक्तपुरको ९९ चोक उत्खननमा जोड दिनुपर्ने बताए । 
    
कार्यक्रममा बागमती प्रदेशसभा सदस्य सुरेन्द्रराज गोसाइ, भक्तपुर नगरपालिकाका प्रमुख सुनिल प्रजापति, उपप्रमुख रजनी जोशी, इतिहासविद् प्रा डा पुरुषोत्तमलोचन श्रेष्ठ, पुरातत्व विभागका महानिर्देशक सौभाग्य प्रधानाङ्ग, नेपाली इतिहास, संस्कृति तथा पुरातत्व केन्द्रीय विभागका प्रमुख प्रा डा सोमप्रसाद खतिवडालगायतले भक्तपुर नेपाल मण्डलको सांस्कृतिक राजधानीको रुपमा रहँदै आएकाले मूर्त र अमूर्त सम्पदाको अथाह भण्डार रहेको बताए ।