डर्टमुण्ड ११ वर्षपछि च्याम्पियन्स लिगको फाइनलमा

जर्मन क्लब बोरुसिया डर्टमन्ड युरोपियन च्याम्पियन्स लिगको फाइनलमा पुगेको छ । पीएसजीविरुद्ध दोस्रो लेगमा १-० र समग्रमा २-० को जीत हासिल गर्दै डर्टमुण्ड ११ वर्ष पछि च्याम्पियन्स लिगको फाइनलमा प्रवेश गरेको हो ।

पीएसजीको घरेलु मैदान पार्क डेश प्रिन्सेसमा भएको दोस्रो लेगमा डर्टमुण्डका लागि खेलको एकमात्र गोल म्याट्स हुमेल्सले गरे । स्टार खेलाडीले भरिपूर्ण पीएसजी यस सिजन पनि च्याम्पियन्स लिग उपाधि उचाल्नबाट चुकेको छ । 

सेमीफाइनलको पहिलो लेगमा पटक पटक बाधक बनेको गोलपोस्ट दोस्रो लेगमा पनि पीएसजीका लागि बाधक बन्दा फ्रेन्च टोली फाइनलमा पुग्न सकेन । 

यसअघि पहिलो लेगमा पनि डर्टमन्डले फ्रेन्च क्लब पीएसजीलाई पराजित गरेको थियो । यी दुई टोली यसै सिजन एकै समूहमा रहेका थिए । दुई खेलमध्ये एक खेल डर्टमुण्डले जितेको थियो भने अर्को खेल बराबरीमा सकिएको थियो ।

डर्ट मुण्डले अब उपाधिका लागि रियल म्याड्रिड र बायर्न म्युनिखबीचको सेमिफाइनल विजेताविरुद्ध खेल्नेछ ।