मानव तस्करीमा संलग्न रहेको आरोपमा १ जना पक्राउ

प्रहरीले मानव तस्करीमा संलग्न रहेको आरोपमा १ जनालाई पक्राउ गरेको छ ।

पक्राउ पर्नेमा कैलालीको गौरीगङ्गा नगरपालिका–२ घर भई हाल ललितपुर महानगरपालिका–७ झम्सिखेल बस्ने ४१ वर्षीय तेजराम चौधरी छन् । 

केन्द्रीय प्रहरी प्रवक्ता एवं प्रहरी नायब महानिरीक्षक भीमप्रसाद ढकाललेका अनुसार चौधरीले अमेरिका पठाइदिन्छु भन्दै ठगी गरेका थिए । 

केही समय ब्राजिलमा गएर काम गर्नुपर्ने र फिलिपिन्स हुँदै अमेरिका जानुपर्छ भन्दै उनले ४ जना पीडितबाट पटक-पटक गरी १ करोड १८ लाख ५९ हजार रुपैयाँ लिएका थिए । त्यसपछि उनी सम्पर्कविहीन भएको भन्दै प्रहरीमा उजुरी परेको थियो ।​

उनले पीडितलाई ब्राजिलको वर्किङ भिसामा श्रम स्वीकृतिसमेत निकाली फिलिपिन्स पुर्‍याएका थिए । तर त्यहाँको अध्यागमनले नक्कली कागजात भनी फिर्ता पठाएको प्रहरीले जनाएको छ ।

पीडितहरू नेपाल फर्केपछि पुनः दिल्ली पुर्‍याई होटलमा बन्धक बनाइएको र पीडितहरूले रु ३९ लाख बुझाएपछि होटलबाट मुक्त भएको प्रारम्भिक अनुसन्धानबाट खुल्न आएको ढकालले जानकारी दिए ।

उपत्यका अपराध अनुसन्धान कार्यालयको टोलीले पक्राउ गरेका चौधरीलाई थप अनुसन्धान तथा कारबाहीका लागि वैदेशिक रोजगार विभाग ताहाचल पठाइएको छ ।