कोशी प्रदेशको मुख्यमन्त्रीमा नेकपा (एमाले) संसदीय दलका नेता हिक्मतकुमार कार्की नियुक्त भएका छन् । उनलाई प्रदेश प्रमुख परशुराम खापुङले संविधानको धारा १६८ को उपधारा ५ अनुसार बिहीबार मुख्यमन्त्रीमा नियुक्त गरेका हुन् ।

हिक्मतले आफ्नो दल एमाले र नेकपा (माओवादी केन्द्र)लगायतका गरी ५२ जनाको समर्थन पाएका छन् । कोशी प्रदेशसभामा ९३ जना सांसद छन् । ५२ बहुमत संख्या हो ।

हिक्मत दाबीमा जनता समाजवादी पार्टी (जसपा) सांसद निर्मला लिम्बू पनि सनाखतका लागि आएकी थिइन् । तर उनले हस्ताक्षर भने गरेको पाइएको छैन ।

सरकारमा सहभागी माओवादी केन्द्र र सरकारलाई समर्थन गरेको एमालेले गत चैत २६ गते सरकारलाई दिएको विश्वासको मत र समर्थन फिर्ता लिएपछि मुख्यमन्त्री केदार कार्कीले मङ्गलबार राति १२ बजेसम्ममा प्रदेशसभाबाट विश्वासको मत लिनुपर्ने थियो । तर, उनले विश्वासको मत नलिइ राजीनामासमेत दिन अस्वीकार गरेपछि प्रदेश प्रमुखले नयाँ सरकार गठनको आह्वान गरेका थिए ।

नयाँ सरकार गठनका लागि प्रदेश प्रमुख परशुराम खापुङले तीन दिनको  समय दिएका थिए । तर केदार कार्की अदालत जाने भएपछि हतार–हतार गरेर हिक्मत कार्कीलाई मुख्यमन्त्री नियुक्ति गरिएको हो । नियुक्त गर्नुअगाडि प्रदेश प्रमुखले सांसदहरूको सनाखत गराएका थिए ।

हिक्मत तेस्रोपटक कोशीको मुख्यमन्त्रीमा नियुक्त भएका हुन् ।