नेकपा (एमाले) कपिलवस्तुको नेतृत्वका लागि दुई जनाबीच प्रतिस्पर्धा हुने भएको छ । पार्टीको १० औं अधिवेशनबाट नेतृत्वका लागि डम्बर शर्मा र बाबुराम खनालले उम्मेदवारी दर्ता गराएका छन् । शर्मा निर्वतमान अध्यक्ष र खनाल उपाध्यक्ष हुन् ।

विश्राम चौधरीले उम्मेदवारी फिर्ता लिएपछि शर्मा र खनालबीच प्यानलबीच प्रतिस्पर्धा हुन लागेको एमाले प्रदेश अध्यक्ष राधाकृष्ण कँडेलले जानकारी दिए ।  

उपाध्यक्षका लागि शंकर पाण्डे, भेषराज पाण्डे र टोपलाल पोखरेलको उम्मेदारी परेको छ । सचिवमा सीबी गहतराज र विश्व कार्कीको उम्मेदारी परेको छ । उपसचिव खुलामा ७ जनाको उम्मेदारी रहेको छ । 

यस्तै कमल क्षेत्री, गोविन्द आचार्य, देवी पोखरेल, छवि रेश्मीमगर, विष्णुप्रसाद गौतम, शारदानन्द यादव र विनोद चौधरीले उपसचिवमा उम्मेदारी दिएका छन् । 

महिला उपसचिवमा सुशीला दर्लामी र माधुरी अग्रहरीको उम्मेदारी परेको छ । १२० सदस्यीय जिल्ला कमिटीको १२ खुला सदस्यमा ५३ जनाको उम्मेदारी परेको छ । बुधबारबाट शुरू भएको अधिवेशनमा ५५९ जना प्रतिनिधि सहभागी रहेका छन् ।  नयाँ नेतृत्वका लागि बिहीबार साँझ निर्वाचन शुरू हुँदैछ ।