नेपाली कांग्रेसका केन्द्रीय सदस्य नैनसिंह महरले सहकारी ठगी प्रकरणमा संसदीय छानबिन समिति नबनाए प्रधानमन्त्रीमाथि पनि छानबिनको प्रश्न उठाउने चेतावनी दिएका छन् । नेपाल प्रेस युनियन, रुपन्देहीले बिहीबार बुटवलमा आयोजना गरेको पत्रकार सम्मेलनमा बोल्दै नेता महरले गरिब जनताको पैसा दुरुपयोग गर्ने सहकारी ठगहरूलाई कारबाही हुनैपर्ने दाबी गरे । 

‘सहकारी दुरुपयोग गर्नेहरू सत्तामा छन्,’ उनले भने, ‘जीबी राई र रवि लामिछानेमाथि छानबिन नभएसम्म कांग्रेस पछाडि हट्दैन । सरकारले संसदीय छानबिन समिति नबनाए प्रधानमन्त्री पुष्पकमल दाहाल प्रचण्डमाथि पनि छानबिनको प्रश्न उठाउनेछौं ।’ सरकारले अपराधीलाई बचाउन चाहेको नेता महरको आरोप छ । 

इलाम र बझाङको उपचुनावमा कांग्रेस पराजित हुनुमा नेतृत्वको कमजोरी रहेको नेता महरले बताए । ‘पार्टीका पदाधिकारीहरू उपचुनावमा ध्यान दिएनन् । ‘पि–फाइभ’ खटिएनन् जसले गर्दा कांग्रेसले पराजित भोग्यो ।’ अब कांग्रेस प्रतिपक्षमै बसेर पार्टीलाई बलियो बनाउनुपर्ने उनले बताए । 

‘कहिले माओवादीसँग कहिले एमालेसम्म लहसिएर सरकारमा कांग्रेस जान आवश्यक छैन,’ महरले भने, ‘आफ्नै बल र संगठनले आउँदो निर्वाचनमा लड्ने गरी कांग्रेस जुट्नुपर्छ ।’ उनले कांग्रेसको आगामी नेतृत्वका लागि देउवाको विकल्प नभएकोसमेत दाबी गरे । उनले भने, ‘पार्टीमा दोस्रो पुस्ताका नेता नेतृत्वमा आउनेजस्तो मैले अरुलाई अहिलेसम्म देखेको छैन ।’