बर्खास्तीमा परे प्रशिक्षक पुबुदु दासानायके

कुनै बेला नेपाली क्रिकेट टोलीको प्रशिक्षक समेत रहेका  पुबुदु दासानायकेलाई क्यानडाले पदबाट हटाएको छ । आईसीसी टी–२० विश्वकप सुरु हुन केही दिनमात्र बाँकी हुँदा क्यानडाले प्रमुख प्रशिक्षकको भूमिकामा रहेका दासानायकेलाई पदबाट हटाएको हो । 

पुबुदु दासानायके सन् २०२२ को जुलाईदेखि क्यानडाको राष्ट्रिय क्रिकेट टोलीको प्रमुख प्रशिक्षक पदमा कार्यरत थिए । उनी श्रीलंका र क्यानडाका पूर्वखेलाडी पनि हुन् । 

क्यानडा क्रिकेट संघमा नयाँ नेतृत्व आएपछि प्रशिक्षकको विषयलाई लिएर पदाधिकारीबिच नै विवाद सुरु भएको समाचारमा जनाइएको छ । 

समाचारअनुसार, क्रिकेट क्यानडाका उपाध्यक्ष गुरदीप क्लेयरले बुधबार नै पुबुदुलाई यस विषयमा जानकारी गराएका थिए । विश्वकपका लागि टोली छनोटको विषयलाई लिएर पनि प्रशिक्षक र क्रिकेट क्यानडाका पदाधिकारीबिच विवाद देखिएको थियो । 

पुबुदुको स्थानमा क्यानडाले नयाँ प्रशिक्षक भने नियुक्त गरिसकेको छैन ।