संसदीय छानबिन समितिको कार्यादेश टुंग्याउन कार्यदलको बैठक बस्दै

सहकारीको रकम हिनामिना प्रकरणको छानबिनका लागि गठन गर्ने भनिएको संसदीय छानबिन समितिको कार्यादेश (टीओआर) बनाउने जिम्मेवारी पाएको कार्यदलको बैठक आज पनि बस्ने भएको छ । बिहीबार (हिजो) निष्कर्षविहीन भएको बैठक आज पुनः बस्न लागेको हो ।

बैठक सिंहदरबारस्थित कानुन, न्याय तथा संसदीय मामिला मन्त्रालयमा बिहान ८ बजे शुरू हुनेछ । हिजो बसेको बैठकमा सत्तापक्ष र प्रतिपक्षले आ–आफ्ना अडान नछाडेपछि सहमति जुट्न सकेको थिएन । 

हिजोको बैठकमा सत्ता पक्ष एमाले र रास्वपाले सूर्यदर्शन, सुप्रिम, स्वर्णलक्ष्मी, सानो पाइला लगायतका सहकारीको नाम उल्लेख गर्ने तर लामिछानेको नाम उल्लेख नगर्ने प्रस्ताव गरेका थिए । 

नेकपा (एमाले)का प्रमुख सचेतक महेश बर्तौलाले कार्यदलको बैठक आज बस्ने बैठकले निष्कर्ष निकाल्ने दाबी गरे । गृहमन्त्री लामिछानेलाई शुरूमै दोषी देखाउने प्रवृत्ति कांग्रेसमा देखिएकाले बिहीबार सहमति जुट्न नसकेको उनले बताए । 

कार्यदलमा सरकारको तर्फबाट कानूनमन्त्री पदम गिरी र एमालेको तर्फबाट प्रमुख सचेतक महेश बर्तौला, प्रमुख प्रतिपक्षी नेपाली कांग्रेसका सहमहामन्त्री जीवन परियार र राष्ट्रिय स्वतन्त्र पार्टी (रास्वपा)का सांसद शिशिर खनाल थिए ।