सङ्खुवासभाको किमाथांकासहित १४ वटा नाका शनिबारदेखि खुल्ने

सङ्खुवासभाको किमाथांकासहित १४ वटा नाका भोलि (शनिबार)देखि खुल्ने भएका छन् ।

कोरोनाकालमा चीन सरकारले बन्द गरेका १३ जिल्लाका ती नाकाहरू खुल्न लागेका हुन् । चीनसँग नाका जोडिएका उक्त नाकाहरू २०७६ सालदेखि बन्द भएका थिए ।

उत्तरी क्षेत्र चीनसँग जोडिएको सङ्खुवासभाको किमाथांका नाका भोलि उपप्रधान एवं परराष्ट्रमन्त्री नारायणकाजी श्रेष्ठको उपस्थितिमा खोलिने सङ्खुवासभाका प्रमुख जिल्ला अधिकारी ध्रुवबहादुर खड्काले जानकारी दिए ।

किमाथांका नाका बन्द हुँदा सबैभन्दा ठूलो असर भोट खोलामा परेको स्थानीयहरू बताउँछन् ।

यहाँका बासिन्दाले चिनियाँ बजारबाट खाद्यान्न आयात गर्दै आएका थिए ।

नाका बन्द हुँदा विभिन्न सामग्रीसमेत अभाव हुने गरेको प्रजिअ खड्काले बताए । ‘नाकासम्म पुग्नका लागि २ किलोमिटर ट्रयाक अझै खुलेको छैन’, उनले भने ‘अर्को वर्ष यति बेलासम्म चाहिँ ट्याक्टरसम्म कुद्न सक्छ होला ।’​​

किमाथांकालाई परम्परागत नाका भन्ने गरिएको छ । यो नाका खुल्दा भोटखोलाबासीलाई सहज हुने अनुमान गरिएको छ ।

सदरमुकामबाट सामग्री लिएर जाँदा गाडीबाट ओर्लेर दुई दिन पैदल हिँडेपछि मात्रै यो नाका पुग्न सकिन्छ ।

उत्तरी क्षेत्रमा वि.स.२०३५ सालमा किमाथांका भन्सार कार्यालय स्थापना भएको थियो । तर द्वन्द्वका कारण भोट खोलाको हटियामा रहेको सीमा भन्सार २०५७ सालदेखि सदरमुकाम खाँदबारी सारिएको थियो । चीन सरकारले मुहानमा कोरोना संक्रमण देखिएपछि बन्द गरेको थियो ।

नेपाली नाकाभन्दा करिब १५ मिनेट दूरी पर पुगेर उपप्रधानमन्त्री तथा परराष्ट्र मन्त्री उपस्थितिमा उक्त नाका खोलिने जनाइएको छ । ​

किमाथांका बन्द भएपछि भोट खोला गाउँपालिकामा सदरमुकाम खाँदबारीबाट महंगोमा खाद्यान्न ढुवानी गर्दै आएका थिए ।  

भोट खोलाको किमाथांका नाका सदरमुकाम खाँदबारीदेखि करिब १ सय ६२ किलोमिटर टाढा पर्दछ । किमाथांकाका स्थानीयवासी दैनिक रोजगारीका लागि पनि विगतमा पारिका चाँगा र देन्दाङसम्म जाने गरेका थिए । करिब ६ हजारको बसोबास रहेको यो क्षेत्रमा स्थानीय उत्पादनले तीन महिना पनि धान्दैन ।

किमाथांका, चेपुवा, छुम्सुर रिदाक, थुदामलगायत गाउँका लागि चामललगायत दैनिक उपभोग्य सामग्री किनमेल गर्ने प्रमुख बजार चीनको चाँगा र देन्दाङ हो ।​

विराटनगरको रानी भन्सार नाका हुँदै सङ्खुवासभाको किमाथांकासम्म पुग्ने बाटोलाई चीन-भारत जोड्ने छोटो मार्गका रूपमा लिइन्छ । शनिबार नै एकै साथ १३ जिल्लाको १४ वटै नाका एकै साथ खोलिने जनाइएको छ ।

गोर्खामा दुई वटा नाका पर्छ भने अन्य जिल्लामा १/१ वटा नाका छन् ।

सङ्खुवासभाको किमाथांका, दोलखाको अर्को फालकलगायतका नाका रहेका छन् ।