शीर्ष नेताको बालुवाटार बैठकमा के–के भयो ?

सहकारी प्रकरणमा छानबिन समितिसहितको विषयमा प्रधानमन्त्री पुष्पकमल दाहाल 'प्रचण्ड'ले गरेको प्रमुख दलको बैठकबाट प्रमुख प्रतिपक्षी नेपाली कांग्रेस बाहिरिएको छ ।

बैठकपछि कांग्रेसका प्रमुख सचेतक रमेश लेखकले सहकारी ठगी, गृहमन्त्रीको लाञ्छनायुक्त अभिव्यक्तिसहितका विषयमा छलफल भएको जानकारी दिए ।

‘सहकारीबाट रकम अपचलन र ठगीको विषयमा छानबिन गर्न संसदीय समिति बनाउने कुरा भएको छ । समिति कस्तो बनाउने भन्नेमा साथीहरूले काम गरिरहनुभएको छ। समिति गठनमा सबैको जोडबल र सकारात्मक कुरा भएको छ’, लेखकले भने, ‘यी बाहेक कान्तिपुर मिडियाका अध्यक्षलाई धरपकड गरिएकोमा हामीले प्रधानमन्त्रीको गम्भीर रुपले ध्यानाकर्षण गराएका छौं । त्यस्तै गृहमन्त्रीले संसद्को रोस्ट्रमबाट जुन ढंगले प्रश्न उठाउनुभयो । यसमा पनि प्रधानमन्त्रीको ध्यानाकर्षण गराएका छौं । यसको बारे पनि प्रधानमन्त्रीबाट जवाफ खोजेका छौं ।’

संसद्‌मा देखिएको गतिरोध अन्त्य गर्न प्रधानमन्त्रीले सत्तापक्ष, प्रमुख प्रतिपक्षसहितका शीर्ष नेतासँग छलफल गर्न शुक्रबार साँझ बैठक बोलाएको थिए ।

बैठकमा प्रधानमन्त्री प्रचण्ड, नेकपा एमालेका अध्यक्ष केपी शर्मा ओली र महेश बर्तौला, कांग्रेसका नेताहरू पूर्णबहादुर खड्का, कृष्ण सिटौला, गगन थापा, रमेश लेखक, माओवादीका हितराज पाण्डेलगायतका नेताहरू सहभागी थिए ।

समिति गठनको गाँठो नफुक्दा शुक्रबार पनि प्रमुख प्रतिपक्षी दल कांग्रेसले संसद् बैठक अवरुद्ध गरेको थियो ।