कीर्तिमानी आरोही कामीरितालाई विमानस्थलमा भव्य स्वागत

सर्वोच्च शिखर सगरमाथाको ३०औं पटक सफल आरोहण गरेर विश्व कीर्तिमान कायम गरेका कामीरिता शेर्पा आरोहण सकेर आज काठमाडौं फर्किएका छन् ।

लुक्लाबाट अपरान्ह काठमाडौं आइपुगेका शेर्पालाई त्रिभुवन अन्तर्राष्ट्रिय विमानस्थलमा पर्वतारोही, पर्यटन व्यवसायीलगायतले भव्य स्वागत गरेका थिए ।

सगरमाथा आधार शिविरस्थित पर्यटन विभागको अस्थायी फिल्ड कार्यालयका अनुसार कामीरिता शेर्पाले यही जेठ ९ गते बिहान ७ बजेर ४९ मिनेटमा सगरमाथाको चुचुरोमा ३०औं पटक पाइला टेकेर कीर्तिमान बनाएका थिए ।

वसन्त ऋतुको जारी आरोहणमा कामीरिताले यसअघि धेरै पटक सगरमाथाको सफल आरोहण गर्ने आफ्नै नाममा रहेको कीर्तिमान तोडेका हुन् ।

यो ‘सिजन’मा कामीरिताले गत वैशाख ३० गते सगरमाथाको २९औं पटक आरोहण गरेर यसअघि २८औं पटक सगरमाथा आरोहणको कीर्तिमान तोडेका थिए । कामीरिताले गत वर्षझैँ यसपटक पनि दुईपटक सगरमाथा आरोहण गरे ।

सोलुखुम्बुको खुम्बु पासाङ्ल्हामु गाउँपालिकाको थामेका ५४ वर्षीय कामीरिता कुशल पर्वतारोही पथप्रदर्शकसमेत हुन् ।

सन् १९९४ मे १३ मा पहिलोपटक सगरमाथाको चुचुरोमा पुगेका उनको नाममा आठ हजार मिटर अग्ला शिखरमा सबैभन्दा बढी आरोहण गरेको कीर्तिमान छ ।