दक्ष खेलाडी उत्पादन गर्ने बुटवलममा जिल्ला फुटबल लिग

दक्ष खेलाडी उत्पादन गर्ने उद्देश्यसहित बुटवलमा शनिबारदेखि रूपन्देही जिल्ला लिग फुटबल हुने भएको छ । अखिल नेपाल फुटबल संघ (एन्फा)को कार्यक्रमअनुसार रूपन्देही जिल्ला फुटबल संघले ए डिभिजन लिग आयोजना गरेको हो । 

संघले शुक्रबार पत्रकार सम्मेलनगरी प्रतियोगितामा फुटबल संघमा दर्ता भएका १० टीम सहभागी हुने जानकारी दिएको हो । रूपन्देही जिल्ला फुटबल संघका अध्यक्ष लोक पुनले लिग सुरुआती अभ्यास भएको बताए । 

प्रतियोगितामा एउटा क्लब च्यापियन बन्नेछ । बुटवलस्थित एन्फा एकेडेमीमा सञ्चालन हुने खेलमा च्याम्पियन हुने टीमले १ लाख, द्वितीयले ५० हजार, तृतीयले ३० हजार र सान्त्वना टीमले २० हजार पाउने कार्यक्रम संयोजक मुकेश कुँवरले जानकारी दिए । 

खेल गर्मीका कारण बिहान एउटा खेल र बेलुका एउटा खेल गरेर खेलाइने छ । अवधिभर ३६ वटा खेल हुने रूपन्देही जिल्ला फुटबल संघका महासचिव हिमाल गौचनले जानकारी दिए । 

जिल्लामा ए डिभिजन क्लब छनोटका लागि आयोजना गरिने यो लिगबाट अंक तालिकाका आधारमा पुच्छारका २ वटा क्लब डिभिजन बी मा घटुवा हुने छन् भने अन्य क्लब डिभिजन ए मा कायम रहने छन् । 

प्रतियोगितामा यो वर्ष समूह एमा बढुवा भएका हिमाल युथ क्लब र सिम्रीक युथ क्लबसँगै साविक विजेता सुनौलो संगम युवा क्लब, गोर्खा ब्वाईज, बुटवल युनाइटेड, सौभाग्य युवा क्लब, फर्साटिकर युवा क्लब, लिस्नु युवा क्लब र डीएमसी रहेका छन् । 

कार्यक्रमका अवसरमा बोल्दै एन्फा रूपन्देहीका अध्यक्ष लोक पुनले जिल्ला लिगबाट नयाँ खेलाडी उत्पादन हुने विश्वा व्यक्त गरे । प्रतियोगिताको उद्घाटन खेल शनिबार दिउँसो साढे ३ बजेदेखि एन्फा मैदानमा साविक विजेता सुनौलो संगम र हिमाल युथ क्लबबीच हुने छ ।