बुटवल र तिलोत्तमामा भएका छुट्टाछुट्टै दुर्घटनामा २ जनाको मृत्यु

रूपन्देहहीको बुटवल र तिलोत्तमामा भएका छुट्टाछुट्टै मोटरसाइकल दुर्घटनामा २ जनाको मृत्यु भएको छ ।  शुक्रबार राति भएको दुर्घटनामा तिलोत्तमा र सैनामैनाका २ युवाको मृत्यु भएको हो । 

इलाका प्रहरी कार्यालय बुटवलका अनुसार तिलोत्तमा नगरपालिका–४ ड्राइभरटोलमा भएको मोटरसाइकल दुर्घटनामा २४ वर्षीय विवेक डुम्रेको मृत्यु भएको छ । तिलोत्तमा–६ का डुम्रेले चलाएको लु३१प १६४२ नम्बरको मोटरसाइकल अनियन्त्रित भएर सडकमै पल्टिएको थियो । 

त्यस्तै बुटवल उपमहानगरपालिका–२ जितगढीमा भएको मोटरसाइकल दुर्घटनामा सैनामैना नगरपालिका–४ का ४२ वर्षीय गोविन्द अर्यालको मृत्यु भएको छ । इलाका प्रहरी कार्यालयका प्रहरी नायब उपरीक्षक विजयराज पण्डितका अनुसार गोविन्दले चलाएको प्रदेश नं. ३–२००२ प २०३६ नम्बरको मोटरसाइकल दुर्घटना भएको हो ।