परराष्ट्र सचिव लम्साल सेन्ट जोन्स प्रस्थान

परराष्ट्र सचिव सेवा लम्साल एन्टिगुवा र बारबुडाको राजधानी सेन्ट जोन्समा आयोजना हुने विकासशील साना टापु राष्ट्र (सिड्स)को चौथो सम्मेलनमा भाग लिन शुक्रबार अपरान्ह त्यसतर्फ प्रस्थान गरेकी छिन् ।

संयुक्त राष्ट्रसंघले आयोजना गरेको सम्मेलन यही जेठ १४ देखि १७ गतेसम्म चल्नेछ ।

सम्मेलनका क्रममा अल्पविकसित देशहरूको समूहका लागि वैश्विक समन्वय ब्यूरोको अध्यक्षका  हैसियतमा सचिव लम्सालले समूहको तर्फबाट मन्तव्य व्यक्त गर्ने कार्यक्रम रहेको परराष्ट्र मन्त्रालयले जनाएको छ ।

साथै उनले आफ्ना समकक्षीलगायत विभिन्न देशका प्रतिनिधिसँग भेटवार्ता गर्नेछिन् ।

सम्मेलनमा दिगो विकासका लक्ष्य प्राप्तिमा विकासशील साना टापु राष्ट्रको प्रगति समीक्षा हुनका साथै नयाँ दशकको लागि कार्य योजना प्रस्ताव हुनेछ ।​

राष्ट्रसंघले प्रत्येक दश वर्षमा सिड्स सम्मेलन आयोजना गर्दै आएको छ ।  चौथो सम्मेलन 'उत्थानशील समृद्धितर्फको मार्गचित्र' शीर्षकमा हुँदैछ ।

परराष्ट्र सचिव लम्साल जेठ १८ गते काठमाडौं फर्कनेछिन् ।