संसदीय समितिको टीओआरबारे छलफल गर्न सिंहदरबारमा कार्यदलको बैठक

सहकारी ठगीको छानबिन गर्न बन्ने संसदीय समितिको कार्यादेश (टीओआर)बारे छलफल गर्न बैठक बस्दैछ।

कानून न्याय तथा संसदीय मामिला मन्त्रालयमा बस्ने बैठकले टीओआमा सहमतिका लागि प्रयास गर्नेछ । शनिबार दिउँसो ३ बजे बस्ने भनिएको बैठक साढे ४ बजेसम्म पनि शुरू भएको छैन ।

यद्यपि आजै निष्कर्षमा पुग्ने नेताहरूले दाबी गरेका छन् ।

शनिबार गृहजिल्ला पर्वत पुगेका कानून न्याय तथा संसदीय मामिलामन्त्री पदम गिरीले आइतबारको संसद् बैठक अघि नै सहमति हुने बताएका थिए ।

साथै ​संसद्का कामकारबाही विनाअवरोध सञ्चालन हुने उनको भनाइ थियो ।

सहकारीको रकम अपचलनमा उपप्रधान एवं गृहमन्त्री रवि लामिछानेको नाम राख्नुपर्ने अडानमा नेपाली कांग्रेस लचक बनेको छ ।

शुक्रबारको बैठकपछि साँझ प्रधानमन्त्रीको सरकारी निवास बालुवाटारमा संसद् खुलाउनेबारे शीर्ष नेताहरूबीच छलफल भएको थियो।

बैठकपछि नेपाली कांग्रेसका प्रमुख सचेतक रमेश लेखकले छलफल सकारात्मक भएको बताएका थिए ।

साथै कार्यादेशको भाषाबारे शीर्ष नेताहरू बसेर सहमति गर्ने उनले जानकारी दिएका थिए ।