गृहमन्त्रीलाई प्रभुको प्रश्नः लागु औषधको किन खुलेआम बिक्री वितरण भइरहेको छ ?

 आम जनता पार्टी (आजपा)का अध्यक्ष प्रभु शाहले कानुनले प्रतिबन्ध गरेको लागु औषधको खुलेआम बिक्री वितरण हुने गरेको भन्दै यसमा कडाइ गर्नुपर्ने बताएका छन् । उनले लागु औषध आउने स्रोतको सम्बन्धमा अनुसन्धान गर्नुपर्नेमा पनि जोड दिए ।

बुधबार प्रतिनिधिसभा बैठकको शुन्य समयमा बोल्दै उनले लागु औषधको किन खुलेआम बिक्री वितरण भइरहेको छ भन्दै गृहमन्त्री रवि लामिछानेको जवाफ माग गरे । 

‘युवाहरू लागुऔषध दुर्व्यवसनको शिकार भएका छन् । भर्खरका युवाहरू लागु औषधको लतमा अगाडि बढिरहेको हामी देखिरहेका छौँ । व्यक्ति परिवार, समाज  र राष्ट्रलाई नै नकारात्मक असर पार्ने यसको नियन्त्रण किन भइरहेको छैन हामी जान्न चाहन्छौँ’, उनले भने, ‘नेपालको कानुनले लागु औषध विक्रिवितरणमा बन्देज लगाएको छ । तर खुलेआम पाइरहेको छ।  यो किन भइरहेको छ  सभामुखमार्फत मान्य गृहमन्त्रीको जवाफ चाहन्छौँ ।’

उनले लागु औषध समातिएपछि त्यसको कसरी व्यवस्थापन भइरहेको छ भन्नेबारे आफूहरूले जान्न चाहेको पनि बताए । यसबारे गृहमन्त्रीले सदनलाई जानकारी गराउनुपर्ने उनले माग गरे ।