टीकापुर घटनाबारे फरक मत राख्दै बाबुरामले भने– दोषीको नाम भन्नुपर्छ भने हामी भनिदिन्छौँ

नेपाल समाजवादी पार्टी (नेसपा)का अध्यक्ष डा बाबुराम भट्टराईले टीकापुर घटनामा निर्दोषलाई दोषी देखाएर कारागार चलान गरिएको आरोप लगाएका छन् ।

वैकल्पिक राजनीतिक शक्ति स्थापना दिवसको सन्दर्भमा बुधवार आयोजित समारोहमा उनले दोषी करार गरिएकालाई उचित क्षतिपूर्ति दिएर राज्यले माफी माग्नुपर्ने बताए ।

घटनामा घाइते भएकालाई जसले रिक्सामा हालेर अस्पताल पुर्यायो उही साढे ८ वर्ष जेल बस्नुपरेको पूर्वप्रधानमन्त्रीसमेत रहेका भट्टराईले गुनासो गरे । 

उनले टीकापुर घटनामा संग्लग्नको नाम भन्नुपर्ने बेला आएको र आवश्यक परे नाम भनिदिने पनि बताए ।

‘सबैभन्दा पहिला टीकापुर घटनामा जबरजस्ती दोषी बनाइएका थारूहरूलाई उचित क्षतिपूर्तिसहित राज्यले माफी माग्ने बन्दोबस्त मिलाउनुपर्छ । हाम्रो के अपराध थियो । जसले घाइतेलाई रिक्सामा हालेर अस्पताल पुर्यायो त्यो साढे ८ वर्ष जेल बस्नुपर्ने ?’, उनले प्रश्न गरे, ‘घाइतेलाई उठाएर उपचार गर्नेले ८ वर्षसम्म जेलको कालकोठीमा सड्नुपर्ने ? अब जाक्नेवालाको खोजीनिती गर्नुस् । घटना कसले गरायो हामीलाई नसोध्नुस् । लाल आयोगलाई सोध्नुस् । मान्छेको नाम भन्नुपर्छ भने हामी भनिदिन्छौँ । टीकापुरको अब नाम भन्ने बेला आएको छ ।’ 

भट्टराईले साढे १० हजार जनप्रतिनिधि र १ लाख ३९ हजार थारू जम्मा भएको नागरिक उन्मुक्ति पार्टीको महाधिवेशनलाई निर्वाचन आयोगले अवैध भनेकोमा पनि आक्रोश पोखे । 

‘साढे १० हजार जनप्रतिनिधि र १ लाख ३९ हजार थारू जम्मा भएको नागरिक उन्मुक्तिको महाधिवेशनलाई निर्वाचन आयोगले अवैध भनिदिने ? महाधिवेशन नै नगर्ने पार्टीहरू वैध, पुसको कठ्याङ्ग्रिने जाडोमा जनता आएर गरेको महाधिवेशन अवैध ?’

समारोहमा उपप्रधान तथा गृहमन्त्री रवि लामिछाने, जनमत पार्टीका अध्यक्ष डा सीके राउत, नागरिक उन्मुक्तिका नेता रेशम चौधरी, आम जनता पार्टीका अध्यक्ष प्रभु साह, साझा विवेकशील पार्टीकी अध्यक्ष समीक्षा बाँस्कोटा, लेखक तथा साहित्यकार खगेन्द्र संग्रौलालगायत उपस्थित थिए । 

२०७२ भदौ ७ गते कैलालीको टीकापुरमा ८ सुरक्षाकर्मी र १ नाबालकको हत्या भएको थियो । 

तीन तहको अदालतले रेशम चौधरीलाई प्रमुख दोषी करार गरेको थियो । जन्मकैदको सजाय सुनाएर जेलमा रहेका उनलाई संविधान दिवसको अवसरमा सरकारको सिफारिशमा राष्ट्रपति रामचन्द्र पौडेलले आममाफी दिएका थिए ।