प्रदेश नयाँ ढंगले चलाउन संविधान संशोधन गरौं- गगन थापा

नेपाली कांग्रेसका महामन्त्री गगन थापाले संघीय सरकारमा मन्त्रालयको संख्या घटाउने प्रस्ताव अगाडि सारेका छन् ।

शनिबार नेपाली कांग्रेस नागार्जुन नगर कार्यसमितिले आयोजना गरेको प्रशिक्षण कार्यक्रमलाई सम्बोधन गर्दै उनले यस्तो बताएका हुन् । संघीय सरकारमा मन्त्रालयको संख्या घटाएर १०/१२ वटामा झार्नुपर्ने उनको भनाइ छ ।

‘संघ र प्रदेशको संसद्को साइज घटाउनुपर्‍यो । संघमा १०/१२ जना मन्त्री बनाए हुन्छ। हामीले संविधानमा २५ लेखेका छौं। २५ नलेखेको भए अहिले प्रचण्ड नेतृत्वको सरकारमा ५० जना मन्त्री बन्ने रहेछन्,' उनले भने ।

संघमा जस्तै प्रदेशमा पनि मन्त्रालयको संख्या घटाउनुपर्ने उनको भनाइ छ । साथै उनले प्रदेशको निर्वाचन प्रणाली पनि बदल्नुपर्ने बताए। 

यस्तै महामन्त्री थापाले नयाँ राजनीतिक दलहरूले लोकरिझ्याइँका बाहेक केही नगर्ने बताए ।

नयाँ राजनीतिक दलका मन्त्रीहरू जिम्मेवारी अनुसारको काम नगरी सामाजिक सञ्जाल केन्द्रित बनेका उनको आरोप थियो ।