एमालेविरुद्ध तीव्र हमला भइरहेको छ : केपी ओली

नेकपा एमालेका अध्यक्ष केपी शर्मा ओलीले एमालेविरुद्ध तीव्र हमला भइरहेको बताएका छन् ।

शनिवार दिउँसो एमाले संसदीय दलको बैठकलाई सम्बोधन गर्दै उनले यस्तो बताएका हुन् ।

'पार्टीविरुद्ध हमला अत्यन्तै तीव्र रुपमा भइरहेको छ,' उनले भने, 'दिनैपिच्छे नयाँ-नयाँ अकल्पनीय कुराहरू आविष्कार गरेर बजारमा भ्रम फैलाइएको छ ।' 

विरोधी शक्तिहरू राष्ट्रिय शक्तिलाई कमजोर बनाएर देश अगाडि नबढोस् भन्ने चाहनाका साथ अगाडि बढेका उनको दाबी थियो ।

‘आज बिहान मैले एउटा मिडियामा देखें, केपी ओलीले ५ अर्ब खाइसक्यो, निलिसक्यो कि, मुखमा मात्र हाल्न ठिक्क पारेको छ, ४ अरब कि ५ अरब केपी ओलीले खायो भनेर,' उनले भने, 'हाम्रा विरोधीहरू, प्रतिक्रियावादीहरू- जो देश अगाडि नबढोस् भन्ने चाहन्छन्, राष्ट्रिय शक्तिलाई कमजोर बनाउन चाहन्छन् उनीहरूले यस्तै कुरा गरिरहेका छन् ।'