सर्लाहीमा राष्ट्रिय मुक्ति क्रान्तिको 'मधेशी-पहाडी एकता सभा'

राष्ट्रिय मुक्ति क्रान्ति सम्बद्ध कोच-मधेश ब्यूरो र चुरे सिवालिक विशेष ब्यूरोको संयुक्त आयोजनामा 'मधेशी-पहाडी एकता सभा' सम्पन्न भएको छ ।

संविधान सभा सदस्य एवं पूर्वमन्त्री रामनरेश रायको अध्यक्षतामा शनिबार सर्लाहीको लालबन्दीको खेल मैदानबाट शुरू भएको र्‍याली तरकारी बजार चोकमा पुगेर सभामा परिणत भएको थियो।

कार्यक्रममा राष्ट्रिय मुक्ति क्रान्तिका संयोजक तथा पूर्व उपप्रधानमन्त्री राजेन्द्र महतोले राज्यले मधेशका मुद्दालाई ओझेलमा पारेको बताए ।

मधेश आन्दोलन ताका राज्यले मधेशका मुद्दालाई ओझेलमा पार्न पहाडीविरुद्धको आन्दोलन भनेर गलत भाष्य निर्माण गरेको उनको भनाइ थियो ।

राज्यले निर्माण गरेको भाष्यलाई चिर्न र सबै उत्पीडित जाति र समुदायको माग पूरा गराउन सभाको आयोजना गरिएको उनले बताए ।

महतोले लोकतान्त्रिक आन्दोलनको कार्यभार पूरा नभएकोले आफूहरूलाई राष्ट्रिय मुक्ति क्रान्ति गर्नु परेको बताए ।

यस्तै, नेता केशव झाले देशका सबै उत्पीडितहरू अहिलेसम्म छुट्टाछुट्टै संघर्ष गरेकाले कसैले केही प्राप्त गर्न नसकेको दाबी गरे ।

आदिवासी जनजाति, मधेशी, उत्पीडित खस-आर्य सबै मिलेर संघर्ष गर्नुको  विकल्प नरहेको उनको भनाइ थियो । मधेशमा तराई, पहाड, हिमाल सबै भुगोलका मानिस बस्ने भएकोले आपसी सद्‌भाव र सह-अस्तित्व स्वीकार गर्नुपर्ने उनले बताए ।

कार्यक्रममा तामाङ घेदुङका राष्ट्रिय अध्यक्ष मोहन गोले, राष्ट्रिय मुक्ति क्रान्तिका नेताहरू कमला गुरुङ, सुमन सायमी, राजीव झा, बुद्धछिरिङ मोक्तान, जुनतारा पुन मगर, कौसलसिंह कुशवाहा, नेजामुदिन समानी, रमण पाण्डेय, नेरुता मोक्तान, हुसेन खान, विनोद साह, जीवन तामाङ, सञ्जय सिंह, दीपक झा, कृष्णकुमार साह, राजेश यादवलगायतका नेताहरूले सम्बोधन गरेका थिए ।

कार्यक्रमको सञ्चालन स्थानीय युवा नेता जिगमेला बम्जनले गरेका थिए।

तस्वीरहरू

​