सुदूरपश्चिममा बढ्यो बजेटको आकार

सुदूरपश्चिम प्रदेश सरकारले आर्थिक वर्ष २०८१/८२ को वार्षिक बजेट कार्यक्रम शनिबार सार्वजनिक गर्दैछ ।

प्रदेश सरकारले असार १ गते आगामी वर्षको बजेट ल्याउनुपर्ने संवैधानिक व्यवस्थाअनुसार सुदूरपश्चिम सरकारले आज प्रदेश सभामा बजेट प्रस्तुत गर्न लागेको हो ।

आर्थिक मामिला तथा योजनामन्त्री सुरेन्द्रबहादुर पालले प्रदेश सभामा अहिले बजेट प्रस्तुत गरिरहेका छन् ।

चालू आर्थिक वर्षमा २९ अर्ब २६ करोड बजेट ल्याएको सरकारले अगामी वर्षका लागि भने आकार वृद्धि गर्ने भएको छ ।

प्रदेश सभाको बैठक शुरू हुनुअघि लोकान्तरलाई प्रतिक्रिया दिँदै आर्थिक मामिलामन्त्री पालले ३२ देखि ३३ अर्बको हाराहारीमा बजेटको आकार रहेको बताए ।

‘बजेटको आकारबारे यकिन भन्न सकिएन तर चालू वर्षको भन्दा ठूलो बजेट आउँछ,’ पालले भने, ‘३२ देखि ३३ अर्बको हाराहारीमा बजेट हुन्छ ।’

मन्त्री पालका अनुसार यसअघि सरकारले ल्याएको नीति तथा कार्यक्रमअनुसार नै प्रदेश गौरवका योजनालाई निरन्तरता दिने र अन्य क्रममा गत पूर्वाधार विकास योजनालाई तीव्र रुपमा अघि बढाउने योजना रहेको छ ।