कोशीको बजेटप्रति प्रतिपक्षीको प्रतिक्रिया– रक्सी ‘ब्रान्डिङ’बाहेक नयाँ केही छैन

कोशी प्रदेशमा आकार घटाएर आगामी वर्षको बजेट ल्याएको पाइएको छ । चालू आर्थिक वर्षको भन्दा १ अर्ब ५३ करोड ९७ लाख रुपैयाँ कमको बजेट ल्याइएको हो । 

आर्थिक मामिला तथा योजनामन्त्री रामबहादुर मगरले शनिवार प्रदेशसभामा ३५ अर्ब २७ करोड ९३ लाख रुपैयाँको बजेट प्रस्तुत गरेका हुन् । 

चालू आवको बजेट ३६ अर्ब ७४ करोड ३५ लाख १० हजारको थियो । यो बजेट हाल कार्यान्वयनमा छ । 

कोशी प्रदेशको बजेट विगत दुई आर्थिक वर्षदेखि नै निरन्तर घटिरहेको छ । संघीय सरकारले दिने विशेष अनुदान, समानीकरण अनुदान, राजस्व बाँडफाँडबाट प्राप्त हुने अनुदान तथा सशर्त अनुदान कटौती भएपछि बजेट घटेको आर्थिक मामिलामन्त्री मगरले बताए  । 

चालू आवको बजेटमा सशर्त अनुदानको ७ करोड ५५ लाख थप भइ कूल बजेट ३६ अर्ब ८१ करोड ९० लाख कायम भएको हो । यो बजेट पनि ८० प्रतिशत मात्रै खर्च हुने आर्थिक मामिलामन्त्री मगरले बताए । कम खर्च हुनुलाई उनले सरकार फेरबदलको असर भनेका छन् ।

कोशीमा आव २०७६–७७ सबैभन्दा ठूलो बजेट ल्याइएको थियो । उक्त बजेट ४२ अर्ब २० करोड ४ लाख रुपैयाँको थियो । यस्तै आव ०७७–७८ मा प्रदेश सरकारले ४० अर्ब ८९ करोड ९९ लाखको बजेट ल्याएको थियो । 

यसैगरी आव २०७८–७९ मा ३२ अर्ब ४६ करोड ९२ लाखको बजेट ल्याउँदा बजेटको यथार्थ खर्च भने २९ अर्ब ९६ करोड ६४ लाख मात्रै भएको थियो । 

त्यस्तै आव २०७९–८० मा प्रदेश सरकारले ३९ अर्ब ७३ करोड ८३ लाखको बजेट ल्याएको थियो । 

अरु वर्षको तुलनामा यो पटक यथार्थपरक बजेट आएकाले कार्यान्वयन हुने आर्थिक मामिला योजनामन्त्री मगरको दाबी छ । 

प्रमुख प्रतिपक्षी दल नेपाली कांग्रेसले भने बजेटमा केही पनि नयाँ विषय नसमेटिएको आरोप लगाएको छ । पूर्वमुख्यमन्त्रीसमेत रहेका कांग्रेस संसदीय दलका नेता उद्धव थापाले सरकारले परम्परागत खालको बजेट ल्याएको दाबी गरे । 

‘यो बजेट पनि परम्परागत खालको नै छ,’ उनले भने ‘नयाँ केही छैन ।’ यद्यपि उनले रक्सी ब्रान्डिङ गर्ने कार्यक्रम अगाडि बढाइएको भन्दै त्यसको स्वागत गरेका छन् । यसबारे उनले भने, ‘रक्सी ब्रान्डिङ गर्ने कार्यक्रम अगाडि बढाइएको छ । यसको स्वागत गर्छु ।’ 

बजेटको पूर्णपाठः