सहकारी छानबिन समितिले मंगलबारदेखि औपचारिक काम थाल्ने

सहकारी ठगीको छानबिन गर्न बनेको विशेष समितिले मंगलबारदेखि औपचारिक काम थाल्ने भएको छ ।  

‘सहकारी संस्था बचत रकम दुरुपयोग सम्बन्धमा संसदीय छानबिन विशेष समिति’को आइतबार बसेको बैठकले कार्यविधि र कार्यादेश टुंग्याएर मंगलबारदेखि औपचारिक रुपमा काम अगाडि बढाउने निर्णय गरेको जानकारी समिति सदस्य ईश्वरी न्यौपानेले दिइन् । 

‘आज हामी छानबिन समिति, यसअघि बनेको कार्यदलका सदस्य र प्रमुख सचेतकहरूसँग छलफलमा जुट्यौं,’ न्यौपानेले लोकान्तरसँग भनिन्, ‘अब सहकारीमा भएको रकम अपचलनको छानबिनको लागि मंगलबारबाट मन्त्रालय, सहकारी विभाग, प्रदेशका कार्यालय, स्थानीय तहसहितका सरोकारवाला पक्षसँग छलफल गर्छौ ।’

मंगलबार बस्ने औपचारिक बैठकले कार्यविधि र कार्ययोजना पनि सार्वजनिक गर्ने उनले जानकारी दिइन् । 

‘हामीले छानबिन गर्ने मुख्य २९ वटा सहकारीको विवरण मगाउन सचिवालयलाई निर्देशन दिइसकेका छौं । अब मंगलबार कार्यविधि र कार्ययोजना पनि सार्वजनिक गर्छौ,’ उनले भनिन्, ‘हामीलाई अनुसन्धान गर्न दिइएको ४ बुँदे टीओआरभित्रै रहेर छानबिन गर्छौ ।’

चारवटा बुँदामा समग्रतामा एकैपटक छानबिन गर्दै जाने न्यौपानेले बताइन् । 

सात सदस्यीय समितिलको पहिलो बैठक २३ जेठमा बसेको थियो । यही मितिबाट समितिको तीन महिने अवधि शुरू भएको छ । समितिले तोकिएकै समयमा सहकारीको रकम अपचलनको छानबिन गरी प्रतिवेदन बुझाउने दाबी गरेको छ । 

समितिलाई उपप्रधान एवं गृहमन्त्री रवि लामिछाने संलग्न रहेको गोर्खा मिडियामा सुप्रिम, सूर्यदर्शन, स्वर्णलक्ष्मीसहितका सहकारीबाट आएको गैरकानूनी करोडौं रुपैयाँको छानबिनको विषय चुनौतीपूर्ण देखिएको छ । 

यसअघि समितिका दुईवटा बैठक बसेका थिए ।

आधा महिना बित्दा पनि अलमलमा सहकारी छानबिन समिति, संयोजक पार्टी काममै व्यस्त